E lulu ma loimata ae selesele ma le fiafia, o lagona ia sa iai le toatele o aiga uo ma ē masani sa molimauina le Faauuga a le Aoga Tusi Paia a le SAOG Bible College Aukilani lea sa faataunuuina i le afiafi o le Aso Sa 24 o Aperila i le hall a lenei Ekalesia i Magele.
Ua galo uma tiga ma le vaivai i le aufaauu ina ua tau lau o le faamoemoe e ala i le filiga i tausaga sa aoaoina ai mo le afioga a le Atua.
E lē o se mea faigofie le ola aoga, auā e tele fita ma faigata sa ui mai ai, e lē gata i le faatupeina o aoga ae sa iai foi fita sa savalia, ae ana lē seanoa le faatasi ma le tautai o le Agaga o le Atua e lē mafai ona faataunuuina lenei faamoemoe. O le afiafi o le Aso Sa ua mavae, sa maitauina ai le faatumulia o totonu o lenei fale i aiga, o uo ma ē masani aemaise o Ekalesia o loo iai a latou sui i totonu o lenei kolisi sa pepese ma alaga le viiga i le Atua ina ua mafai ona faaiuina ma le fiafia le taumafai sa finauina e nisi o susuga i faafeagaiga faapea nisi o faletua ma sui o aulotu taitasi.
O pesepesega faauuina a le aufaipese mai le AOG i New Lynn, na avea ma faamalosiau ma tapena ai loto o tagata mo le amataina o le polokalame.
Na tatala le faamoemoe i le solo a le Komiti Faafoe a lenei aoga faapea le mamalu i susuga i faiaoga, ona sosoo ai lea ma le taulaga viiga lea sa taitaia ma tatalo faaiu ai le susuga i le faafeagaiga ia Seuga Aumua.
O le susuga le faafeagaiga ia Falanisisi Falaniko sa fai ma sui o le aufaauu i le tausaga 2 ma le 3 e faaleoina le agaga o le faafetai i le Komiti Faafoe ma faiaoga aemaise o aiga ona o le lagolago i le latou sailiga seleni a o sauni atu i lenei faauuga.
Sa faafetai foi i galuega fita a faiaoga i le aoaoina o le laumua, faatasi ai ma lana faamalosi i le aufaauu, “E lei uma le soifua aoaoina i le Upu a le Atua.”
O le Pule aoga ia Sauafea Faatuatua Pulepule na saunoa e faafeiloai le mamalu o Samoa potopoto sa auai e molimauina lenei polokalame, ona sosoo ai lea ma le saunoaga a le taitaifono a le Board le susuga i le faafeagaiga ia Lamamea Motu Matia lea sa ia faaopoopo ai le faafetai i aiga ma faafeagaiga i le lagolago i galuega faatino a le Kolisi.
Na ia luitau ai foi i le aufaauu, ia uma le aoga ia foi ma le poto ma le atamai mai le Atua e faaaogāina ai oe e le Atua i totonu o le Ekalesia. O le upu faauuina a le Atua na saunoa i ai le alii pule aoga mai le aoga Tusi Paia i Lotopa i Samoa le susuga ia Pastor Verenika Batiyak, ma faagasolo ai loa le tufatufaina o tusipasi o i latou ua faauu.
E tasi le tamaitiiti aoga sa faauuina le Certificate In Biblical Studies o le faletua lea ia Iokapeta Laukoko.
Diploma in Biblical Studies (Tausaga 2)
•Ps Pae Aso
•Nuufou Auvaa
•Ps Pelesala Anetone Epati
•Ps Leota Pokati Fiaalii
•Fu‘a Sara Kaleti
•Teinemane Noga
•Leota Iliganoa Pagaialii
•Ps Ropati Ropati
•Esther Afoa Samaeli
•Simon Samuelu
•Sulamai Tau Samuelu
•Ps Maua Sula
•Ps Unasa Ioane Tarako
•Lealofi Tasila
•Ps Maleko Telea
•Israel Fereti Toleafoa
•Vaipou Vaoga
•Vaoga Uatisone Vaoga.
Bachelor in Biblical Studies (Tausaga 3)
•BJ An Chong
•Pasopoia Dliffy
•Ps Falanisisi Falaniko
•Petimara Faumuina
•Tuifoa Leaupepetele
•Tuagata Pepe Silulu
•Keypoilar Rose Taito
•Isabella Matafua Taliai
•Itamai Ualo
•Patolo Ueli
•Vaefaga Jr Vaefaga
Na faaiu lenei polokalame i le faaula a aiga ma uo ia latou sui sa faauu ma ta‘ape ai ma le manuia mai le Atua. Ae o le tele lava o tausaga e faatinoina ai le ‘aiga tele mo le aufaauu a o sauni atu mo le faauuga, ma o le afiafi o le Aso Faraile 22 o Aperila sa faia lea ‘aiga i le hall lava lenei i Magele ma vaaia ai foi le toatele o i latou sa auai e molimauina lea faamoemoe.
