O le Maota o Tupulaga talavou a le Ekalesia Faapotopotoga Kerisiano i Mulinuu na faatumulia i aiga, uo atoa ai le Matagaluega o Leoleo ma Falepuipui auā le faauuga a sui fou o le Matagaluega.
O le fuafuaga a le Matagaluega o Leoleo mo le saogalemu o tagata lautele, e aofia ai le faaopoopo o le fuainumera o Malu o le Malo faatasi ai ma galuega mo ofisa o Leoleo i tua i Itumalo taitasi o loo faagasolo i le taimi nei.
O le vaiaso nei, na faauu ai alii ma tamaitai Leoleo e to‘a 46 faatasi ai ma sui e toafā mai le motu o Toelau ina ua mae‘a a‘oa‘oga ma faamautu ai o latou tofiga faaleoleo.
Na momoli le faamalo a le afioga i le alii Palemia, Tuilaepa Lupesoliai Sailele Malielegaoi ia i latou uma ua faamanuiaina ma fautuaina foi i latou ina ia tautuana le faatinoga o le galuega mo le malupuipuia o le atunuu. Sa saunoa le Komesina o le Matagaluega o Leoleo, Lilomaiava Fou Taioalo, e silia ma le to‘a 300 tusi talosaga e oo atu i tausaga taitasi mo ia avanoa, ae peitai e na o le to‘a 62 e filifilia mai ai ina ia sue i le suega a leoleo, ma o i latou ia e tele lava ina ave i ai le filifiliga mulimuli.
Na o le to‘a 50 i latou na pasi i lea suega ma o i latou foi ia ua faauu i le vaiaso nei, e to‘a 37 alii ae to‘a 13 tamaitai.
O le aofai lenei o le aufaauu e tasi, ae o le ogatotonu foi o le tausaga na faauu ai foi se isi vasega faapea foi.
E ta‘ilua lava la i le tausaga lea ua vaavaai le Matagaluega e faatino ai a‘oa‘oga ma faauu ai sui fou o le Matagaluega.
O se faailo na ta‘ua e le Matagaluega ua manaomia leoleo i vaega eseese o le atunuu ma ua lē o toe tuu tasi atu foi i pulega a alii ma faipule le faatinoga o puipuiga ma le faamalosia o tulafono i itumalo eseese, ona o le manumanuga lava i le faamalosia lea o le tulafono i auala ua aiaia i faiga faavae faaleoleo.
E lē o aveesea ai le faatāua o loo ave pea e le Matagaluega ma le Malo i pulega a alii ma faipule, o le saunoaga lea a le alii Komesina, auā e agai lava i ai leoleo mo se fesoasoani i le tele o mataupu e tulai mai, ma o le tutū faatasi o nei pulega e lua ua manatu le Matagaluega o le a mausali ai le tautua e ofo atu i le atunuu atoa.
E 18 vaiaso na a‘otauina ai i latou i vasega o mataupu e aofia ai le malamalamaaga i moliaga ma suesuega, o le tulafono, Faamasinoga, lotoifale, sauāga i totonu o aiga, saogalemu i luga o auala tetele, saogalemu lautele ma le va o tagatanuu ma le lautele.
E aofia ai i ia a‘oa‘oga polokalame e iloilo ai le malosi i le tino ma le usitaia o faatonuga e tuuina i ai.
Ta‘ua foi e Lilomaiava, o le faiga faavae lava a le Matagaluega, ina ia faaauau ona faaopoopo tamaitai e avea ma Leoleo ina ia aloaia ai le sao o tamaitai, aemaise ai avanoa tutusa i totonu o le Matagaluega.
O i latou mai Toelau o loo aotauina faatasi i Samoa nei, ua mafai ona auai mai ona o se faiga paaga a le Malo o Niu Sila ma Samoa.
I le tufatufaga o faailoga faapitoa, na maua e le alii ia Melani Eteuati le faailoga o le amiolelei ma le faamaoni, ae o le faailoga o le alualu i luma o le taumafai na faamanuiaina ai Vaai Tua.
O le faailoga o le tulaga maoa‘e i a‘oa‘oga i totonu o le potu aoga ma toleniga na maua e le alii mai Toelau o Poni Simi, ma le sili aoao i le vasega faauu ua faamanuiaina ai le alii o Tuifao Luatua.
