O se finagalo lea na faaalia e le Peresitene o le Asosi o Tusitala a Samoa ma atonu o le a toe ave i ai le faamamafa i lenei vaiaso o le fono faaletausaga a tusitala uma o Samoa.
O le fautuaga ua ia faalauiloa mai, ona o le faasala ai o se tasi o Ofisa Faasalalau i Samoa i le vaiaso na tea nei, ua faamaonia lona faalauiloa faalauaitele o se fono a matai o Leauvaa na agiga ai ni lafoga lē faavaea ma le taufaaleaga.
O le faasala ai o le TV3 e totogi le $130,000 tala ona o le faamaonia o le faalauiloa o se lipoti ua manatu le tamalii na aafia ai ua faaleaga ai lona igoa, lona aiga ma lona tofiga o se loia i totonu o Samoa, o se faasalaga na ta‘ua e le Faauluuluga o le Faalapotopotoga o Tusitala i Samoa, JAWS le Susuga Papalii Uale Papalii, e tāua tele le tulai mai, ina ia toe faamanatu mai ai foi i Faatonu o Tala a soo se faalapotopotoga poo soo se Matagaluega tau faasalalauga, leitio, televise ma nusipepa, “… e seu le manu ae tagai i le galu”.
“E ui o loo mautu tulafono ua maua ai le saolotoga faatusitala e tusia ma lipotia ai mataupu eseese, ae e iai lava le tapulaa o lea saolotoga, aemaise pe afai e afaina ai tagata ua taulai i ai lipoti,” o se saunoaga lea a le Alii Peresitene o le JAWS.
Faaalia e Papalii o loo manino lava le faatinoga o galuega faatusitala ma ua toatele lava ua a‘oa‘oina uma i lenei tomai a o lei faafaigaluega ai o tusitala o le atunuu ma o aupega lava o le galuega o le sa‘o o le lipoti ma faamaonia ma le paleni.
A iai nei vaega i totonu o lipoti, na ta‘ua e Papalii e laititi foi le avanoa e tatala atu ai ni mataupu faapenei ma afaina ai galuega aemaise foi o le faatuatuaga ua ave i ofisa o nusipepa, televise ma leitio latou te logologo ai le atunuu e ala i soo se mataupu e tulai mai i totonu o Samoa. Faaalia e Papalii o le faatonu lava o soo se faalapotopotoga faapea e palasi i ai le ulu o le laau pe a tulai mai nei ituaiga faafitauli auā o i latou lava e mulimuli suesue, faitau ma fai le faaiuga i le faaalu o se lipoti poo le taofia foi, ma e toe faamanatu mai ai le Faauluuluga o le JAWS i faatonu uma o ofisa faasalalau ma nusipepa, ina ia mataala i le faatinoga o auaunaga auā lava le saogalemu ma le lelei agai i luma o lenei auaunaga.
“O le tāua ia o le toe siaki o lipoti e agai atu ma tusitala auā e sasi loa le vaai, sasi le faitau, tulai mai ai loa faafitauli faapea,” o se saunoaga lea a le Susuga Papalii.
O le tulaga sa iai le TV3 i le taimi tonu na faasalalau ai lenei lipoti, e lei iai se faatonu o Tala i Vaifanua a lea ofisa faasalalau, ma o le alii lava lea na faia le lipoti na tele ina faatautaia galuega ia o le filifili o lipoti e alu i luga o le tuufaatasiga o Talafou i afiafi taitasi.
O lea faato‘ā lua nei masina talu ona galue se tasi i le tofiga faatonu o lea televise, o le Fetalaiga lea ia Apaui Fuapepe Fesili, lea sa i Ausetalia ma Niu Sila ma o se tamaitai foi na galue i le tele o tausaga i le SBC TV poo le Televise Samoa. Na galue foi a o i Niu Sila i le Leitio o le 531 PI. Atonu o lona iai o le a lē toe vaaia ai se mataupu e pei ona aafia ai nei le televise lenei. O le alii na tusia ma faasalalau le lipoti ua faasala ai nei le TV3, ua galue nei i le vaega o Tala Fou a le Leitio 2AP.
