O le Savali a leoleo, poo le Police Pay Parade a le tusa ma le 180 alii ma tamaitai leoleo o le Ofisa o Leoleo a le Counties Manukau, sa faataamilo i le Wiri Station Road i le Aso Faraile talu ai, aso 1 o Mati 2013. Ona faaiu lea i se sauniga na tufatufa atu ai ni faailoga poo ni pine taualoa, e molimoli ai le faafetai ma le faamalo a le Malo ma le Matagaluega atoa, i galuega fita o loo feagai ma alii ma tamaitai leoleo, i le tausia ma le puipuia o le saogalemu o tagata uma o le komiuniti.
O se sauniga e faataunuu pea e Malu o le malo, e toe tomanatu ai i aso ua mavae, lea sa masani ona agai ane ai leoleo mo o latou totogi sa tailua vaiaso ma fai, ma e tele ina faataunuuina lenei Savali i itumalo uma o loo iai ofisa o Malu o le malo. E iai la le Aso Faraile talu ai, i le ta o le 10 i le taeao.
Sa faamapoopo le savali i luma o le Ofisa o leoleo i Manukau, ma agai atu ai i Wiri Station Rd, faasolo ane ai i le Taulaga Faatau i Manukau ona toe faatini lea i tua ane o le Ofisa autū. O inā sa asiasia ai loa le tulai faaaloalo a leoleo e le tamaitai Minisita ma le Komesina o leoleo.
I lena lava sauniga faapitoa, e toalima(5) Malu o le Malo mai le Ofisa o leoleo i Manurewa, sa faalauiloa faapitoa a latou tautua ma tauaao atu i ai tusipasi ma pine o faailoga faapitoa, e aloaia ma amanaia ai a latou tautua mo le atunuu aemaise le itumalo o loo faaautū i ai a latou galuega.
Mai lea toalima, e toatasi se alii leoleo Maori (Area Commander Inspector Richard Walkie). E toatasi le leoleo paepae (Palagi), toatasi le leoleo Initia, ma alii leoleo e toalua, o tamafanau a Samoa, o Constable Afa, ma Constable Steve Ioane.
O le alii leoleo o Constable Afa na ia maua se pine e aloaia ma amanaia ai le 14 tausaga o lana tautua, e lē gata o lenei taimi umi ua tautua ai, ae sa amanaia foi ana amioga lelei ma uiga tamalii i le faatinoga o ona tiute.
O le isi alo o le atunuu, o le alii leoleo o Constable Steve Ioane, na tauaao atu foi i ai le faailoga e faamalo ma amanaia ai lana tautua lelei o loo faatino i le vaega Field Intelligence area. O i laua uma o loo galulue i le ofisa o leoleo i Manurewa.
Sa tauaao atu foi faailoga i nisi o le atunuu lautele sa auai, e amanaia ai foi sa latou gaioiga na faatino e fesoasoani ai i le pitolaau a leoleo, i le tausia o le filemu ma tetee atu i soligatulafono i totonu o le itumalo.
Sa viiviia ma matuā faaleo le agaga fiafia ma le faafetai o le tamaitai Minisita, Hon Anne Tolley, i le Ofisa o Leoleo i Counties Manukau, ona o le telē o lo latou sao o loo faatino e faaitiitia ai le tulaga o soligatulafono i totonu o le itumalo ma le atunuu atoa.
Sa faamalo foi i aiga o alii ma tamaitai leoleo, i le latou foi matafaioi tele o loo faaauau pea, e lagolagosua ai ma faamāmā avega i o latou tagata o loo galulue i lenei auaunaga tāua o le leoina o le saogalemu o le atunuu.
Na faailoa foi i nisi o fuainumera e faamaonia ai le telē o se faaititiga ua pa‘ū ifo i ai le tele o soligatulafono ma i latou o loo aafia i nei soligatulafono i totonu lava ia o Manukau, pe a fuafua atu i isi tausaga ua tuanai.
E lē gata i lea na faalauiloa foi e le tamaitai Minisita, nisi o meafaigaluega fou o le a faaaogā mo le faatinoina o galuega a le ofisa o leoleo, ina ia atili faafaigofie ma faavavae ai lo latou tali atu i soo se manaoga e tulai mai le komiuniti e moomia ai le latou fesoasoani.
Ae faasilisilia ai le faamanuiaina o le ofisa i Manukau, auā o le a toe faaopoopo mai isi foi leoleo fou e 300 i le latou tautua, mo le faamautinoa lava ua lelei ma malolosi le puipuiga o le saogalemu o le itumalo mai soligatulafono.
Ae mo le Ofisa lava ia o leoleo i Manurewa, o le sauniga faapitoa i lea aso, aemaise le amanaia ma le viiviia o le tautua a le toalima o o latou sui, o se faamaoniga o le siisii i luga o le faatinoga lelei ma le faapolofesa o le latou tautua.
O le tautua lava lenei a leoleo o le Ofisa i Manurewa, o loo tele foi taimi e faaaogā ai i polokalame a leoleo, lea e faaali i le Televise tasi, le Police Ten 7, o loo faamatilatila mai ai le fita o galuega o loo faatino e nei Malu o le malo, ma lo latou naunau ina ia aogā sa latou tautua i le komiuniti atoa o loo latou leoleoina.
Sa auai foi i le sauniga tāua i lea aso le afioga i le alii Faipule o Magele, Susuga Su‘a William Sio, faapea le faafeagaiga ia Pastor Lui Ponifasio, o ia foi lea na tofia talu ai nei (29 Novema 2012) e avea ma Faifeau poo se Failotu mo le faaitu lea i Aukilani i Saute i le Ofisa o leoleo a Manurewa.
O loo galue fesoasoani Pastor Ponifasio mo agaga ma le ola faaleagaga o le aufaigaluega ma soo se tasi e manaomia lea auaunaga mai le matagaluega a leoleo.
