Ona o faafitauli sa aafia ai Tupulaga Samoa i le va ma o Apoliki faapea alo ma fanau a le faiganuu i Kuiniselani nei i le fā tausaga talu ai, e lē o mapu lava le tausia pea o le saogalemu e pei ona faagasolo ai pea le sootaga vavalalata ma galuega soofaatasi a le Ofisa mamalu i Leoleo o Kuiniselani, Elder Groups – Aboriginal ma Torries Strait Islands faapea Aiga Samoa North Brisbane Association Inc.
E lē gata i lea o loo galulue malosi foi le tele o mafutaga Samoa i Brisbane e tausia pea le filemu ma puipuia tupulaga talavou mai le tele o faafitauli e ono tulai mai.
O le Aso Lulu, 24 o Aukuso i le 10.00 i le taeao, na faataunuuina ai se faigalotu faamavae ma se faamanuiaga i le Maota Fono Samoa i Deception Bay, ma sa taitaia e le faafeagaiga taulagi ia Rev Sabu Samoa, o le Ekalesia EFKS.
O le Peresitene o le Mafutaga a le Aiga Samoa North Brisbane Association Inc sa auai ma nisi o le mafutaga faapea nisi o le atunuu na maualuga ai le faamoemoe.
E to‘a 62 sui o alii ma tamaitai Leoleo e aofia ai ma leoleo Samoa (QLD Seniors Police Officers and Pacific Liaison Police Officers), na tuua Brisbane mo Samoa i le Aso Faraile, 26 Aukuso mo se malaga ee lua vaiaso.
O lea faatasiga na tālo e le mafutaga i le itu i Matu o le Aiga Samoa North Brisbane Association Inc, lea o loo matilatila ai le Maota Fono e tasi i Kuiniselani.
O se sootaga ma le Ofisa Mamalu o Leoleo i Samoa, ma le faatāuaina o le a‘oa‘oina ma le silafia o tu ma aganuu a Samoa, ina ia fesoasoni i galuega i Ausetalia nei, e ala mai lea i le Ofisa o Aganuu ma Leoleo i Apia i Samoa e mafua ai lenei malaga.
Sa matagofie lea mafutaga faamavae ae faaiuina i se taumafataga o le aoauli ma ona teuteuga masani, ona lūlū aao ai lea ma faatofa.
