Talimalo Samoa tauvaga Tausala o le Pasefika 2011

O le tauvaga o le sailia o se Tausala o Samoa o le 2011 i le 2012 o le a faataunuuina i le Aso Toonai, 3 o Setema 2011 i le maota o Tupulaga o le ekalesia EFKS i Mulinuu.

O tapenaga mo lea faamoemoe e tāua tele auā o le tamaitai o le a manumalo o le a fai ma sui o Samoa i le tauvaga tele e sailia ai se Tausala o le Pasefika o le a talimalo ai lo tatou atunuu i le vaiaso muamua o le masina o Tesema 2011.

Ua faailoa mai e le tamaitai pule o le Pulega o Tagata Tafafao le afioga Matatamalii Sonja Hunter, sa ave le ofo a Samoa e talimalo faatasi ai ma ofo a isi atunuu, peitai sa fulisia le lagolago a sui na auai i se fonotaga a le tauvaga o le Tausala o le Pasefika e tatau ona toe foi mai i Samoa le faamoemoe auā o Samoa o le toaiga lea o tauvaga Tausala o le Pasefika na amatamea i le faamoemoe i le naunautaiga e sailia auala lelei uma e siitia ai le atiina a‘e o tagata tafafao mai fafo.

O le sauni ai o tamaitai e toaono mo le tauvaga e sailia ai se Tausala o Samoa sa amata i se feiloaiga a le tamaitai Pule o le Pulega o tagata tafafao ma sui o pisinisi ma kamupani ua latou lagolagoina tamaitai e toaono.

Sa valaaulia ai foi sui tusitala o nusipepa, televise ma leitio e molimauina le uluai feiloaiga ma tamaitai ma kamupani lagolago poo sponsors.

O se feiloaiga na faamalamalama ai vaega uma o le faamoemoe aemaise o le polokalame ua faataatia mo le sauni atu i le sailiga o se tamaitai Samoa e avea ma tausala o le atunuu, e sui tulaga i le tausala o iai nei le tamaitai o Jolivetti Ete.

O le feiloaiga lenei sa faia i le faletalimalo o le Orator i Tanumapua lea sa faia ai ma le se‘i e iloa ai numera a tamaitai o le a faatulaga ai i latou i le po o le tauvaga. Na faia ai foi ma le se‘i o autū poo topics o le a faia i ai tapenaga a le tausala e fuafua i ai sana saunoaga.
O tamaitai o le a sailia ai se lalelei poo se Tausala o Samoa e pei ona o le a taualuga i ai sauniga o le vaiaso o le Teuila e aofia ai le tausala o Samoa mai Ausetalia.

O i latou nei: Agnes Sitagata, Filipina Leatualevao, Ida-Tifitifi Fuimaono, Olevia Ioane, Philomena Vaa ma Rebecca Sutherton o le Tausala Samoa lea mai Ausetalia.

O polokalame o tapenaga a tamaitai tauva ua aofia ai se asiasiga i le falemai o tamaiti i le maota gasegase i Motootua, le asia o le nofoaga o tina ma tamā matutua i Mapuifagalele, faapea se valaaulia a le taitaifono o le tauvaga o le a faia ai se faaafe i luga o le vaa o le Lady Filifilia lea o le a feiloai ai tamaitai ma faamasino o le tauvaga.

O loo faatulaga mai foi se feiloaiga ma alii ma tamaitai tusitala o nusipepa, leitio ma televise ile atunuu.

O le tauvaga o le tausaga nei ua tupu ai se mea muamua o le lē auai o le Tausala o Samoa mai Niu Sila.

Ua teena e le Komiti o le Tausala Samoa ma le Teuila le fuafuaga a le Komiti o le Tausala a Niu Sila e malaga mai le tamaitai ua avea ma tausala e auai i polokalame o le Teuila faapea le tapenaga uma o le tauvaga Tausala Samoa.

Ua faaalia e le taitaifono le afioga i le Palemia o le Minisita foi o le Pulega o Tagata Tafafao Susuga Tuilaepa Lupesoliai Sailele Malielegaoi, e nunumi ai tagata pe a auai le Tausala o Samoa mai NZ, auā o le a faalauiloa ai ma le tamaitai o ia o le tausala o tagata Samoa o aumau ma alaala i Aotearoa.