E pei lava ona mae‘a faataitai le aniani ua totō i Samoa lava ia, o lea ua agai le Matagaluega o Faatoaga i lona vaega o suesuega i Nuu e faalauiloa i le atunuu le isi laau ua totō ma ua vaaia le ola lelei i Samoa nei.
O le karoti lea ua totō i lenei vaitaimi ma e vaaia le lelei o le ola o lea laau i Nuu i le nofoaga lea o suesuega ua faia ai se togā karoti tele ua ola ai. O lea na valaaulia tusitala atoa ai nisi o le atunuu e agai ane e tofo fua o le karoti ua sauni nei mo le faatau atu i faleoloa eseese i Samoa. Ua iai foi le faamoemoe a lelei le tali mai a le atunuu i le karoti ua totō i Samoa o le a vaavaai loa i le maketi i motu tuaoi o Samoa mo le faatau atu i ai o lenei oloa.
O Niu Sila lea e sau tasi ai lea oloa mo Samoa nei ae o loo iai karoti ua totō ma faatau i Tonga ma e vaaia ai foi le ola lelei o lenei fualaau faisua. O le taumafaiga a le Matagaluega ina ia faaauau ma faaopoopo le tufa atu o le pepa o loo iai le fatu o le karoti auā le totoina e le mamalu o le au faifaatoaga.
O lea la ua faalauiloa maua vaaia le lelei, o le a faagasolo loa le totoina se‘i vaavaai poo fea tonu le itu o le atunuu e ola lelei ai le karoti ae o fea foi e lē ola ai.
O le tasi lenei o fualaau faisua ua manino le tele o le tupe o loo alu ai a faleoloa sii atoa ma faleoloa supamaketi o loo alu i le faatau mai i Samoa auā e toatele lava latou te faaaogāina le karoti, pei lava o le aniani ma a lelei le ola ma taulia i Samoa ona faaitiitia ai foi lea o le tupe alu a le au faioloa i Samoa e tau faatau mai ai i fafo lenei fua o faaeleeleaga.
O le tele o ripoti ua faia i lea fualaau ua totō i Samoa, e maofa le toatele i le lelei o le ola a le karoti i Samoa ae ua tele tausaga e tau faatau mai lava i fafo lea fualaau faisua. E na o Nuu lava lea ua faatautaia le totoina o lenei fualaau ae o le malulu lava na faaalia e le au faifaatoaga e foliga mai e faigofie ai ona ola lea laau i nofoaga faapea i Samoa e pei foi o le aniani latou lea ua vaaia e fā ituaiga ua mafai ona totō ma ola aemaise o le fua i totonu o le atunuu.
Ma e pei foi la o le aniani, a lelei ona ola ma tausi e le au faifaaatoaga o le a lē taumate le taofi loa o le agai i atunuu mamao o le au faipisinisi o oloa auina mai i fafo e tau saili fua nei o fualaau ‘aina ma fualaau faisua ae o le a lagolago foi i faifaatoaga i Samoa nei ia latou oloa fia faatau i totonu o le atunuu.
