Amata vaiaso faatāua o le Siosiomaga

O le uluai vaiaso lava o le masina o Novema, o le taimi lea ua atofaina auā le unaia ai o mataupu tau i le Siosiomaga i le faamanatu ai o le Vaiaso le Siosiomaga. O le faatāua ua ave i lenei tausaga i le faamamāina o gataifale ma vaitafe.

O le motu o Manono-tai i le Aiga i le Tai lea ua faamanatu ai lenei vaiaso tāua e ala i le sauniga o le tatalaga o lenei vaiaso ua faapea ona ave i lea motu.

O le faasilasilaga a le Matagaluega o Punaoa Faalenatura ma le Siosiomaga. O le taumafaiga lava ina ia ave le faamamafa i se tasi o galuega ua amata nei e le Matagaluega o le faamamāina lea o gataifale o vaega o Manono. O le afioaga o Faleu Manono ua feagai nei ma le tele o faigata. Ua faasā ona toe fagotaina ogasami o lenei motu e le Matagaluega. O le mafuaaga ona o le tele o le alamea ua vaaia i lea nofoaga ma ua faaleaga ai vaega o le ogasami o le motu.

E lē mafai la ona fagotaina ogasami o Faleu auā e fai o le onā ai o le tagata e agai i lea vaega o le sami ae ua lē toe maua ai foi ni figota ae o ni i‘a auā e faatama‘ia uma e le alamea amu ma lē maua ai loa ni taumafa i ogasami nei o le motu.

O le polokalame la lea ua faamautu e le Matagaluega mo le faamanatu ai o le Vaiaso o le Siosiomaga, o le itu lea o le a faapea ona aveese e sui o le Matagaluega le alamea ma seiloga lava ua mamā ona faatoa mafai loa lea ona toe tatala faigafaiva i Faleu.

O le taimi lenei o loo agai le aufaifaiva o le afioaga i isi itu o le motu auā se i‘a mo le tausiga o aiga ae tainane se tupe maua auā o le vaitau lenei ua faanoi uma lava vaega o atinae a nuu e pei foi la o le sami latou ua pulea lava e alii ma faipule o latou ogasami mai i le fagota fua e isi afioaga, ae o le tele lava e tatala le avanoa pe a faanoi lelei atu le au tautai o isi afioaga e pei o Faleu ona ua iai le faafitauli lea i ona ogasami.

O le ola faapea o le alamea e mafua mai e pei ona ta‘ua i suesuega, o se vaitau o tafega ma timuga tetele, a mae‘a ona vaaia loa lea o le tele o le alamea i se ogasami ma ua tele sami o le Pasefika ua faamauina ai le faaleagaina o amu ma isi meaola o le sami e lenei meaola o le sami. O le alamea e lavea i le aiga o fetu o le sami ma e oona tele.

O le fuaitau e fofo faaalamea se mataupu ua faasino i le togafitiga o le tagata e lavea pe tuia ai foi i se alamea, e toe avane lava ave maai o le alamea e toe tu ai le tagata lea e lavea ma e iai le manatu o tuaa o le atunuu ma tautai, e toe mimiti uma ese lava e le alamea le ona na muai aafia ai se tagata.

E le faigofie la le galuega lea ua alo atu i ai le Matagaluega ina ia mautinoa e aveese uma le alamea mai i ogasami o Faleu Manono ae seiloga lava e mamā ese faatoa iloa e toe ola se laau ae o se meaola o le sami i lea nofoaga.

O le taulai o le vaiaso o le siosiomaga lautele ua vaavaai ai foi le Matagaluega ina ia faamamā vaitafe i Savaii faapea ai le motu o Upolu.
O le faaiuga o le vaiaso na tea nei sa faatautaia ai ni faamamā i soo se itu o le atunuuu ae o vaitafe ma ogasami ia ua unai le atunuu atoa e agai ane e faatino le faamamāina auā lava le ola maloloina o meaola ma laau o le sami atoa ai ma vaitafe.