Ua tala mai le lagi le mamalu o le Atua, auā ua lauiula le fale nai Amoa, ma tini lau o le faamoemoe sa taumate pe tua ma ni a.
Sa tauivi ma loimata lenei ua tali faaaliali le Atua e ala i le faamoemoe ua taunuu manuia. O le Aso Toonai 20 Oketopa na faataunuuina ai le faauuga o le aoga Faale-Tusi Paia ua igoa “Ia Malamalama Agape Bible College” Brisbane.
O le susuga ia Ferdinand ma le faletua ia Susitina Jahnke o loo faatautaia le aoga faale-Tusi Paia i Brisbane, e pei ona fofoa ma faavae mai e lana auauna ia Dr Peniamina Williams.
O le susuga ia Ulale Ulale o le isi lea faiaoga. E ui ina felavasai mai le tele o mailei a le fili peitai, ana lē seanoa Ieova, e lē tini i le 4 tausaga o le taufetuliga.
O se feau tāua na momoli mai e le pule aoga: O le faamoemoe ua taunuu, o le laau lea o le Ola.
O le aso na faia e Ieova tatou te olioli ma fiafia i ai. I le aufaauu aemaise le tausaga fā, faatāua le aso auā e le toe foi mai, o le aso na taulimaina ai faailoga poo tusipasi sa filifiliga i ai ma tautiga ma loimata.
O le auga foi o lenei aso, e lē o oe, e lē o a‘u, e lē o se isi lava, a o le Atua toatasi na faia oe ma o le aso lenei, ua faia foi le aso mo oe.
O outou māmā na, ua i outou lima, manatua le motto a le Aoga “Ulufale ia Aoaoina, Ulufafo atu e Auauna i le Atua ma Lona Finagalo” (Enter to Learn, Go Forth to Serve).
E to‘a 13 le aufaauu na tauaaoina faailoga o le Bachelor of Theology: Terry Filimaea Fauea (sui faasalalau a le Penina o Asuisui); Poulava Sam (Uncle Sam’s Catering); Ioasa Kepu; Alice Kepu; Iosefa Collins; Seti Ah Kee; Mavis Lee Hang Jahnke (Dux 2012); Walter M Jahnke; Amataga Imo; Kolisi Matila; Malaki Seve; Fereti Purcell; Lilomaiava Tolopaepae.
Sa auai le susuga i le Sui Minisita ia Niko Lee Hang mai Samoa i le faauuga faatasi ma le anoanoai o malo faaaloalogia sa matuai uigaese ai le faatumulia o le faamoemoe.
O nisi o i latou nei i lalo sa tauaaoina Associate of Theology Degree: Ioane Sitevili; Peni Tamilo; Chris Purcell; Wiki Kaio; Leuli A Logo; Olive Fonoti (A.A. Top Student); Siaosi Mavaega; Oge Faresa; Tupuola Loia; Fetaiai Samuelu; Taatia T Mavaega, ma Kuini Faresa.
Na foi le gogo ma si ana ia auā na le i alo tamala le fale‘aiga a le Uncle Sam’s Takeaway (Poulava Sam ma Lorna Matautia) i le tapenaina o le fofoga taumafa.
