O le maliu o se tamaitai ina ua aafia i ni manu‘a mai se pulufana ua taofia ai e leoleo se alii mo suesuega i lona faaoo o le maliu i le tamaitai e faapea o sona tuafafine.
Ua faaalia e le Sui Komesina o le matagaluega o leoleo ma falepuipui le afioga Leaupepe Fatu Pula, ua molia lea taulealea i le fasioti tagata faamoemoeina.
Peitai na ia faailoa i se feiloaiga ma tusitala o lē ua molia sa ia tagofia le laau malosi o le ituaiga o le 12 ma lona lē iloa le pa faafuasei o le aupega ma lavea ai lona tuafafine, lea na nanati ane i le falemai i Leulumoega mo ni togafitiga ae na maliu ai lava.
O le tamaitai sa i tua o le tunoa ma nisi tagata o le aiga ae pa faafuasei ai le laau malosi. E 23 tausaga o lē ua molia i le faalavelave lenei, ae 21 tausaga o le tamaitai ua maliu. O le faalavelave lenei na tulai mai i le pitonuu o Olomanu i Mulifanua.
Molia i laau faasāina
O nisi o solitulafono o loo faia i ai suesuega i le taimi nei o le umia o laau faasāina o le maruana lea o loo sailia e leoleo se taulealea o le nuu o Lepa o loo masalomia o ia e ana laau maruana e 14 e lē o faailoaina i le lipoti a leoleo poo ni maruana laiti pe ni laau ua uumi ma matutua, na maua i se osofaiga i se fanua i uta o lea afioaga.
O le isi mataupu tau laau faasāina na maua ai se tagata i luga o se pasi o ula ai lana sikaleti maruana, ae o se isi lava mataupu faapea ua molia ai ni alii se toalua na maua i Lelata o la umia ai ni sikaleti maruana.
O ia taulelea talavou sa maua o savavali i luga o le alatele. E iai foi se solitulafono e fesootai ma le sauaina o meaola o loo faia i ai suesuega e mafua i se tagi a se aiga faasaga i se tagata na ia umia se agaese ma faaoo ai se manu‘a i le taifau a lea aiga.
