E lē o loia uma o loo aafia i le finagalo o le Palemia ua soona maualuluga ma taugata a latou pili poo legal fees e faasino i le faatinoga o le latou galuega.
O le tulafono taufaaofi o le a iai se taimi ona folasia lea i luma o le Palemene, o le a faatonutonu ai pili a loia mo tagata lautele e sulufai atu i ai mo se fesoasoani i le tele o mafuaaga ua tatou iloa ma silafia.
O loo tetee le sosaiete a loia i Samoa i lea tulafono, ona e lē gata ina aiaia ai faasalaga ae e oo lava le malosi o ia faasalaga i le nofosala i le falepuipui e pei ona faaalia e se tasi o sui o le sosaiete.
Ua faailoa e le Palemia i luga o le leitio o le 2AP, ua leva ona tatau ona tuuina atu le tulafono taufaaofi i le Palemene, ae ona ua talosaga atu le sosaiete a loia e fia silasila i ai, le mafuaaga ua toloa ai le faataatia o le tulafono i le Palemene.
“Ua toe tatalo mai le asosi a loia se‘i toe tuu atu tasi se‘i toe mafaufau atili i ai, ia o le tulaga lena faatamā i le Malo, a tagi mai le fanau e faapena ona fesoasoani i ai, ae lē tuua ai le tulaga naunautai o le Malo se‘i tau faatonutonu mea ia.
E lē o loia uma, e iai a loia ia e matuā maoa‘e a latou faiga, a lē mafai ona maua latou pili ua se‘i ma fanua ma fale o tagata e totogi ai a latou pili”.
O nai sailiiliga a lenei nusipepa i ni finagalo o le atunuu e tusa ma lea fuafuaga a le Malo, na manino mai ai e toatele e lilifa o latou lagona i le fiafia o le a maua se fesoasoani mo i latou.
“O se fuafuaga lelei tele pe a ou toe mafaufau i se taimi sa ou sulufai atu ai i se ofisa loia mo se mataupu a lo matou aiga tau fanua, ae e ui lava sa uma ona totogi le galuega a le ofisa loia ae ou te talitonu sa fai lava si taugata”.
O le finagalo lea o se tamā matua, o se matai ua lē finagalo e faailoa lona suafa.
O le faamatalaga a le toeaina, o le mataupu sa finau ai ma le isi itu o le latou aiga, o se fanua umia saoloto na nonofo nisi lava o lona aiga ma fua ma faasalalau e faatau e aunoa ma le logoina o tagata e au i le eleele o loo maioio i le uili poo le will a o latou mātua ua leva tausaga talu ona maliliu.
“E lē fesiligia le maualuga o lea tomai aoaoina, ae ou te iloa e pei lava o mea uma o loo tatou ola ma soifua ai i se atunuu e iai ni pulega lelei e lima taitaiina ai tagata, ae e leai se tuaoi o mea lelei i lo‘u lea taofi”.
“E pei a ona ou fai atu, o le toatele o le au aoaoina o le atunuu na mafua ona maua le poto o tupe a le atunuu na ave ai i fafo e faasikolasipi; e tatau la ona foi mai ona tautua lea o le atunuu ma le fuafua tatau.
O nai fomai la a tatou o atu i ai e aumai le pili e 20 poo le 30 tala, o le matuā agelu o ia pili; maumau pe ana faapena foi ma loia. A o lou alu atu lenei ae tapa le 20 ma le 30 afe le totogi a o le tau atoa mulimuli ane ai o le va o le 100 i le 150 afe, o le matuā lē mafaufau o nei pili.
E lē mafai la ona tuufauina, ma o le Malo magafagafa e vaai i itu uma o le tatou atunuu ia i latou o loo moomia le fesoasoani a loia ina ia fai ma le fuafua tatau, ae lē o le faaloloto tele”.
E mo le silafia e le aufaitau, o nisi o tagata e molia i ni solitulafono mamafa ae lē gafatia ona totogi se loia, o loo mafai ona maua sea fesoasoani ae totogi e le Malo se loia e tu mo sea tagata.
