E misia se mafutaga pe a tetea ma faatofa, ae ui i lea, ona o le valaauina a le Atua i le soifua galulue, o le tulaga foi lea e pei ona iai le sologa o le galuega faagasolo a auauna paia a le Atua e feuia‘i. O Pr Alesana o se lupe faalele a Faleasiu ma le faletua ia Ane o Letogo ma Falealupo.
O le po o le Aso Gafua na faia ai le faamavaega a le Ekalesia Aso Fitu Samoa Tutoatasi a Inala ma le faifeau ma le aiga, ona ua filifilia e le Atua mo le Ekalesia a Broadmeadows i Melepone. Ua lata i le tausaga talu ona galulue i Inala ae toe valaauina mo Melepone.
O le taitai Toeaina o Inala o le susuga ia Tamala Folau Fetoai faapea le lagolagosua a le susuga i le toeaina ia Sefo Tuafuti.
O lea lava po sa faapea ona auai i le faamavaega le faafeagaiga ia Foa ma le faletua ia Mary Vaeluaga ua tofia e tausia le lafu mamoe. O le tulaga ina ia faamanino pea ma faamalamalama vaega uma o le galuega i le auauna o le a tu i le foe ae lei tuuvaa le susuga ia Pr Alesana ma le aiga. Na manino le mata o le vai i lea po ma ta‘ape le fuamanusina ma le mama ua lomi ma le vaa ua goto. Na feofoofotai foi ma vaaia le laufofoga maligi ona o mafutaga motusia.
Ia manuia le galuega fou Pr Alesana ma Ane Tuiletufuga, ia manuia foi le galuega fou a le susuga ia Foa ma Mary Vaeluaga!
