E vaiaso atoa lea o le a faatali ai le atunuu i le iuga o le faitauga o palota faapitoa lea na amata faitau i le asō. Mai se faasilasilaga o le Ofisa a le Faiga Palota na faaalia ai e le Sui Komesina Faimalomatumua Mathew Lemisio, o le vaiaso atoa lea ua fuafua e faagasolo ai le galuega tele o le faamautu o le numera o palota. E ta‘i 10 itumalo ua faagasolo le faitauina o a latou palota faapitoa i le asō ma tuu atu ai le avanoa e faamautu ai palota uma nei ua aoina ma faamaumau.
O le palota o le 2011 e lua lelei vaiaso o faia lenei galuega peitai o le taulai a le ofisa o Faiga Palota i lenei tausaga ina ia mautinoa e mae‘a uma lava le faitauga i totonu o le vaiaso e tasi.
E 360 pusa palota faapitoa ia e fai i ai le faitauga ma e taitasi sui a i latou na tauva o loo saofafai ai foi e faamautu le faitauga o lea vaega tele o faiga filifiliga a le atunuu. E feololo lava itumalo e ono tulai mai ai ni suiga i le mae‘a ai o lenei galuega ma o iuga na faitau uma i le Aso Faraile o le a iai lava suiga mai i faigapalota faaiu nei ua faatoa faitau i lenei vaiaso.
A o faagasolo ai le faitauga o palota faapitoa i Mulinuu i lenei vaiaso, o lea ua matauina le matau toto‘a e failautusi a sui tauva o iuga taitasi o pusa palota o loo faapea ona talai ma faamautu ai lea palota ma lea palota.
O itumalo nei ua faapea ona matauina toto‘a le faaiuga ona o suiga e ono tulai mai ai. E lua lava suiga, o le atili mamao ai o le va i le tulaga muamua ma le tulaga lua poo le see mai o le tulaga lua i le tulaga muamua poo le tulaga tolu foi i le tulaga muamua.
O itumalo e pei o Vaimauga i Sisifo numera muamua o loo vaaia ai le va o le sui manumalo i le Aso Faraile ia Lenata‘i Victor Tamapua, ma Lautimuia Uelese Vaai e 170 palota. O le aofai o palota faapitoa o loo tālia ai se iuga mautu e 211.
O le nofoa o Faleata i Sisifo, ua vaaia ai le vava lalata o palota a le tulaga muamua, Lealailepule Rimoni Aiafi ma le tulaga lua ia Ulu Bismarck Crawley faapea ai le tulaga tolu ia Ale Vena Ale. I le va lava o Lealailepule ma Ulu Bismarck e 78 palota ae o le aofai o palota faapitoa e 348.
I le itumalo o Falealili i Sisifo – e laitiiti le va o palota na manumalo ai lē sa faipule i lea itumalo o Tusa Misi Tupuola lea e na o le fā (4) ana palota na maualuga ai i le sui tamoe fou ia Aumua Isaia Lameko.
E 234 palota faapitoa lea e tālia ai se iuga o lea faiga filifiliga. O Aumua Isaia o le alo o le tamā ia Tuiloma Pule Lameko ua tele tausaga o avea ma faipule o Falealili lea ua tofia i le Fono a Sui Tofia. I Faasaleleaga Numera 1 i Sasa‘e, e 20 palota o loo va ai Pauli Ivan Williams ma Sili Epa Tuioti ae e 143 palota faapitoa o loo tālia ai le faaiuga atoa o lea foi palota.
I Gagaemauga Numera 3 i le tausinioga i le va o lē sa minisita o Punaoa Faale-Natura ma le Siosiomaga ia Faamoetauloa Faale Tumaalii faatasi ai ma le Komesina Lagolago a Leoleo sa iai o Nafoitoa Talaimanu Keti, e 112 palota o loo va ai le toalua lea, ae e 323 palota faapitoa ia ua faatali ai poo ai o le a manumalo i lea nofoa.
Ae o le tausinioga i le va o Pa‘u Sefo Pa‘u lea e 90 palota na manumalo ai ia Namulauulu Sami Leota, e 331 palota faapitoa ia e faitauina i lenei vaiaso e saili ai poo ai o i laua e tulai mai i le tofi.
O le susuga Papalii Li‘o Ta‘eu Masepa‘u lea sa i le tofi mo le Tautua Samoa na tulaga tolu i lea faiga filifiliga.
