O se tina e suafa ia Gau, e maua i le ma‘i māliu (epilepsy) ua saili fesoasoani nei ina ua faatea ese mai i lana poloka i le maketi i Fugalei e le pulega o le maketi i Fugalei, atoa ai ma tagata tuaoi o loo fai foi a latou poloka i lea nofoaga.
O le loma ai o le palota ae tu mai lea tamaitai i le tatou ofisa ma le faamatalaga ua lē iloa poo fea o le a sulu i ai ae na fautuaina ia e agai mai e laga le mataupu ua faatea ai nei o ia mai i le Maketi i Fugalei.
Ua silia i le 10 tausaga o fai le poloka e faatau ai taifa‘i pula, o esi, koko Samoa ma isi mau fua o faaeleeleaga a lenei tamaitai. O ā lava taumafa e mafai ona ia faatau mai i fua o le eleele ua ia faatau ai ma o se poloka ua masani ai le mamalu o le atunuu ma ua agai lava i ai.
E iai ona uiga e leotele ai ma e ta‘u e nisi o faatau oloa i lea nofoaga e soona leotele ma ua iai taimi ua lē mafaufau ai foi i lo latou manatu.
O le faatolu lea ona fasi o lea tamaitai i lea nofoaga, ma agai ai loa i le ofisa o leoleo ma faaulu ai sana tagi i le vaiaso na tea nei. Na molimauina le lē mātū o le palapala o loo sau i se lavea i lalo ane o lona laugutu se‘i tulou.
Ua fufula foliga ma o loo fula foi vaega o lona fofoga. O loo iai se lavea i lona papatua ona na togi e se tasi o fai poloka, o se alii e lē mamao ese lava ma le nofoaga na fasi ai, ae na ia ta‘ua na fasi ia e tagata ua ave i ai le poloka sa ia faaaogāina mo ana faatauga.
O se isi foi vevesi i le vaiaso atu muamua na ave ai o ia e nisi o le au faatau oloa i leoleo faapea ua lafo ni upu matautia ma le masoā i le maketi. Na loka e leoleo mo le aso atoa oso ai ma le ma‘i māliu ma faatoa toe tatala mai ai i tua.
O le manatu o Gau e vaai maualalo ia te ia ma ua tele upu faatauemu e lafo atu ma mafua ai lava le feeseeseai ma nei tagata. E tautala foi ma ta‘u gaioiga e manatu Gau e faasā ona fai i le maketi, ma atili inosia ai lava o ia e nei tagata ae e faalafi ai lava ma le itu lea i lona manatu, o le taumafai e aveese ia mai i lana poloka ua masani ona tumutumu atu i ai le au faatau ae ave e nisi tagata.
Na toso i fafo o le maketi ma sasa i amo, tatu‘i ma takiki, o lana molimau lea ma e leai foi se isi na oo i ai le tusitala e fesiligia na teena tuua‘iga nei ma le faamatalaga e lē o auau faatasi e fasi Gau ae ua matuā tetele lava le amio puaa o Gau ma ana tala e talafo atu i tagata faatau oloa pe a misa i le faiga o lana galuega.
“E lē iloa pe aisea e aiā mai ai fua i le faiga o a‘u faatau, o le mafuaaga lava lea o le matou misa ma ua auaufaatasi uma lava i latou ia e i o‘u autafa ma le pulega ma tagata faigaluega i le maketi lava ia i Fugalei e tuli ese a‘u ae ou te lē o fia alu ese mai i le maketi,” o le faamatalaga lea a lea tamaitai.
“Ona pau lenei o le auala e mafai ona maua ai sa‘u tupe e faatau ai a‘u fualaau ma maua ai se meaai a lo‘u aiga,” o lana faaopoopo mai lea ina ua agai sa‘o i le maketi ma toe fesiligia i latou na faaoolima i lea tamaitai.
E oo mai i le taimi lenei e lē o gaioi lava se suesuega i lenei mataupu ona o lea na pisi leoleo i le palota ae na fai ane ia Gau o le a o latou suesueina.
E tele vevesi faapea e tulai mai ae e leai lava ni moliaga e faia ma na agai i le alii e suafa ia Mefi Lemo e vaaia le maketi i Fugalei, ma ia faapea mai ai, o le latou tiute o le faatupu o le filemu peitai ua tele lipoti i le faatupu vevesi o Gau ma mafua ai lava ona manatu e faatea ona o ana upu e lafo i isi sui o loo fai a latou poloka.
Na fesiligia pe aisea la na ave ai Gau i le ofisa o leoleo i le tagi ua fai upu masoā ae aisea na lē ave ai se tagi i le faaoogalima na faia faasaga i lea tamaitai, ae ua lē tali mai le alii Pule.
O le tele o le taimi e lē ea mai i luga lea alii ae na ona faapea mai e sili lava le aveese. Na fesiligia i aitalafu e faia i lea tina e lei totogia ae tali ane e lē iloa e ia lea tulaga. Na fesiligia foi i le aveese o oloa a le tina a o taofia ai e leoleo ma le tuu ai o se isi aiga i lea lava nofoaga ae ua lē tali mai foi.
O lea la ua iai nisi tagata ua alolofa i lea tamaitai ua ofo ane galuega e na te faatauina ai oloa a nei tagata pe a agai e malolo i o latou aiga ae o iina foi ua agai i ai i latou nei e lē o lelei lava le va ma lea tamaitai.
O le mau a se isi tamā na ia ta‘ua e tatau ona alu Gau e malolo i le fale ona e ma‘i ma e lē logosa‘ia e se tasi ona uiga. Na fesiligia foi pe leai lava se tasi na taofia le faaoogalima ae e leai se isi na tali ane.
Na laga e le toatele le alu atu fua o le tusitala e lipoti mai nei mataupu auā ua tupu soo ae na faamalamalama i ai ua soli le tulafono ma ua oo i le ofisa o Leoleo le tagi a le tina. O loo taumafai lava la Gau e toe avatu le poloka ia te ia ma na oo foi i le ofisa o le Palemia ma le Sui Palemia sa iai ina ia saili ai se fesoasoani ma ua faatonuina nei le suesueina o lenei mataupu.
