O le faaaliga lea a le alii Pule o le Kamupani Vaalele a le Polenisia lea e malaga ana vaalele laiti i le va o Upolu ma Pago Pago i le faalauiloa ai o le manaoga o le Kamupani Vaalele fou o le Samoa Air e faaaoga le malaevaalele i Fagalii.
“O le taimi lenei e na o le tasi lava le kamupani lea e faaaogaina le malaevaalele i Fagalii, o le Polenisia ma o lea ua oo mai le manaoga o le Samoa Air ona o loo iai le latou fuafuaga ina ia malaga i Amerika Samoa – o lona uiga e toe faalautele le fale lea e faaaoga nei ona e na o le tasi lava le vaega e siaki ai uta faapea pepa malaga.”
Faaalia foi e le Afioga Tauā Fatu Tielu, o le isi faaopoopoga e tatau ona fai i le nofoaga lea o se isi ofisa fou mo le kamupani vaalele a le Samoa Air.
O loo iai foi le faamoemoe o le Samoa Air e agai atu i Fagalii ana faigamalaga i le va o Upolu ma Savaii, o se auaunaga e lei toe faia lava e le Polenisia ona o le manatu e gau ai le kamupani.
O le toatele o tagata na ta‘ua e Tauā Fatu ua faaaoga lava femalagaaiga i le vaa a lalo aua e taugofie atu ma ua tele foi femalagaaiga i le va o motu e lua e faia i lea aso ma lea aso.
O le mafuaaga lava lea ua le o toe faatautaia ai ni femalagaaiga a le Polenisia i Savaii.
Faaalia e le Afioga Tauā Fatu Tielu, sei vagana lava ua totogipau se faigamalaga i vaalele ona e fai lava si taugata o femalagaaiga tau vaalele i lenei vaitau, pe afai e le tutumu pasese i taimi uma o femalagaaiga ma e na o le gau ai o le kamupani.
Ae o lea ua laga e le Samoa Air faigamalaga nei ina ia faaauau.
Faaalia e se tamalii ua tele foi tausaga o pulea le Kamupani Vaalele a le Polenisia, a o malaga i fafo atu o le atu Samoa vaa o lea Kamupani, le Afioga lea a Papalii Grant Percival, e faamaonia le finagalo o Tauā Fatu, ona e le o toe taugofie lava femalagaaiga tau vaalele, ma o vaalele foi o loo faaaoga e le Polenisia e taugata atu pe a faaaoga i femalagaaiga, ae e le o lava pasese.
Peitai o le tamalii lea ua iai le manaoga e faaauau faigamalaga i Savaii, o se tagata faipisinisi e le soona agai lava i se atinae e aunoa ma le lava o suesuega i lea atinae. Ta‘ua e Papalii Grant, o le alii o Chris Langton o se tamalii faipisinisi ua molimauina foi nisi o ana taumafaiga o loo faamanuiaina i le atinae o vaalele, ma o se tagata ua leva ona galue o se pailate ma o se faipisinisi i totonu o Samoa.
Faaalia e Papalii Grant e mautinoa lava o lona manaoga e faalautele ana atinae e ala i le faatuina o le Samoa Air ma ave ai le faamuamua i lenei auaunaga ua leva e le o toe faia, e tatau ona manuia.
O le taimi lenei o le Polenisia le kamupani vaalele o le atunuu lea o loo toalua ma le Inter Island Airways, le kamupani vaalele mai i Amerika Samoa o loo tautuaina le mamalu o tagata femalagaai i le va o Samoa e lua ma o lea la o le a iai ma le isi kamupani a Samoa le Samoa Air.
Ua talafeauga foi le faatuina o lenei kamupani fou ma le fuafuaga a le Malo e fausia se malaevaalele i le atu Aleipata ona o le manaoga ia latalata atu femalagaaiga e faatautaia i le va o Amerika Samoa ma Samoa nei.
O se fuafuaga na toe laga ai le lē toe faaaogaina o malaevaalele laiti i Savaii, le tasi i Maota ma le isi i Asau, ae o le finagalo o le Malo o lea lava e faagasolo fuafuaga i le toe faaauau ai o atinae i malaevaalele nei e lua, ae o Aleipata, ua manino le faafaigofie ai o femalagaaiga ona o lea e latalata i Amerika Samoa ma o se taumafaiga lenei o le a tele foi suiga o le a iai, ae o ni fuafuaga e talafeagai ma le manaoga ua iai i lenei vaitau aemaise o le siisii pea o le fesootaiga i le va o motu e lua.
O le faamuamua a le Samoa Air i le taimi lenei o femalagaaiga ia i le va o Upolu ma Savaii ma atonu o le a vave ona vaaia ni suiga i le galuega faalautele a le kamupani vaalele o le Polenisia i le malaevaalele i Fagalii pe a faamautu loa feutagaiga ma le Samoa Air.
