Sa fesiligia a‘u e le TV Pasefika poo le ā so‘u taofi i fuafuaga a le Malo a le National ua toe fuafuaina nei mo i latou o loo maua penefiti mai le Malo.
O la‘u tali i ai, o lea ua aumai se feau malosi mai le alii o John Key e tuua‘ia le sese ma faaleaga i soo se isi o loo maua mai se fesoasoani mai le Malo, tusa lava poo se isi ua ma‘i, e lē o faigaluega, poo se isi foi o loo maua le penefiti ona e lē o atoatoa le malosi o le tino poo le mafaufau, ma i latou o loo iai fanau laiti. Ma o le feau lea ua aumai e Key, e lē o toe talafeagai ona maua e ia tagata se fesoasoani mai le Malo.
O le feau lenei a Key ua faaosooso ai ma faatosina ia i latou e faailogalanu ma i latou e lē fiafia i tagata o loo ola i le penefiti e amata ona faasagatau, ma faaleaga, ma faifai i se vaega pito i sili ona faatauvaa ia Niu Sila, poo se vaega foi e ao i le Malo ona puipui i ai.
O le mea o le a tatou vaai i ai, o le a toatele nei i latou o le a faaalia faamatalaga i nusipepa ma le TV, ma luga o alaleo o Papalagi, e faasagatau ia i latou o loo maua le fesoasoani tau penefiti mai le Malo.
O le a avea lenei faasagatau ia i latou o loo ola i le penefiti e vevesi ai le Atunuu, ae aloese ai Key mai le talia o fesili o loo fesiligia ai pea o ia, pe aisea lava le mea o loo tele ai le tupe a le Malo o loo faaalu pea i le aufaipisinisi tetele, faapea le aumau‘oa ma le au faifaatoaga
(farmers federation) ma latou e pulea faletupe, aemaise kamupani inisiua ma isi.
Aisea lava le mea ua ave ai le faamuamua i le fesoasoani o lana faigamalo ia i latou o loo tele tupe, ma o lenei fesoasoani i le aufaipisinisi, ua atili tele ai lava le aitalafu a le Malo, lea o loo pologa ai nei le Atunuu i le totogiina o le $380 miliona i le vaiaso talu ai lenei aitalafu.
A o le toatele o le Atunuu o loo pologa i le taugata o le tau o meataumafa, le maualuga o le tau o le moli eletise, ma le taugata lava ua iai le tau o le soifuaga.
E lē gata i le taugata o le tau o le soifuaga, a o lea lava o loo maualalo totogi maua a le toatele o tagata faigaluega.
O lea foi ua fuafuaina ina ia faafaigata ona toe maua e se isi se fesoasoani tupe mai le Malo, ma ua amata lava ona unai i latou o loo maua penefiti e le Malo ina ia o e sue galuega e faigaluega ai. A o le fesili, o fea o iai ia galuega pe afai o lea o loo silia ma le 270,000 le aofai o tagata ua leai ni galuega?
O loo fai pea faamatalaga a Key ma lana vaega e faafoliga ai faapea ua mafua ona tele le aitalafu a le Atunuu lea o loo totogiina nei le $380 miliona i le vaiaso, ona o le tupe ua faaalu ma faaaogā mo le faaleleia o le aai o Kalaisetete.
E matuā lē sa‘o lava lenei faamatalaga – e na o le 10 pasene o lea aitalafu o loo faaaogā mo Kalaisetete, auā o le tele o fale ua faaleagaina e le mafui‘e e tatau ona totogi mai e kamupani inisiua sa inisiuaina ia fale ma pisinisi.
O le mafuaaga tonu ua telē ai lenei aitalafu, ona ua telē le tupe ua lē toe maua e le Malo talu ai le faapa‘ūina o lafoga totogi a le aufaipisinisi tetele ma i latou e tele tupe maua.
Ua aumai foi le Tala o le Tupe a le Malo mo le tausaga 2011 i le 2012 o loo faaali mai le tele o tupe ua tipi ese mai pakeki a matagaluega a le Malo auā ua lē toe sau i totonu tupe sa masani ona maua mai lafoga a le aufaipisinisi ma i latou e tele tupe maua.
O le ata lea ua aumai e le Tala o le Tupe a le Malo, o loo totogi e le toatele o le Atunuu le lafoga o le GST lea ua sii i le 15%, ae aai fua lava le aufaipisinisi tetele ma le aumau‘oa.
O le mafuaaga foi lea ua aumai ai e le Tala o le Tupe e $980 miliona ua tipi ese mai matagaluega uma a le Malo mo le isi 3 tausaga o i luma.
O lona uiga o le a iai nisi o le aufaigaluega a le Malo o le a vāea mai a latou galuega. Talu ona tulai mai le National ua silia ma le 2000 le aufaigaluega a le Malo ua vāea mai galuega.
O le a toe faaopoopo nei i ai i le tausaga 2011 i le 2012 le isi vaega o le a lē toe faigaluega mo le Malo.
Ua silia foi ma le $2.6 piliona ua tipi ese mai le KiwiSaver mo le isi 4 tausaga o i lumanai. Ua taofi nei le 50 pasene o le sao a le malo sa masani ona maua e le tagata e ona le teugatupe.
E amata i le tausaga 2012 ona faapa‘ū le sao a le aufaipisinisi i teugatupe o le KiwiSaver. O le a maua na o se vaega o le 50 pasene, ma o lea 50% o le a e totogiina se vaega i le Ofisa o Lafoga.
O le tausaga 2013 o le a sii ai le sao a le tagata e ona le teugatupe mai le 2 pasene o loo iai nei agai i le 3 pasene.
E $448 miliona o le a tipi ese mai le pakeki o le fesoasoani mo aiga e iai tamaiti ua ta‘ua o le Working for Families.
E 387,000 le aofai o aiga i Niu Sila o le a iai suiga i le fesoasoani sa masani ona latou maua. E 7000 le aofai o aiga o le a lē toe maua le fesoasoani lea.
O pine ia mai le Tala o le Tupe a le Malo ua manino ai lava ia te au, e leai lava se fesoasoani ua toe maua e o tatou aiga talu ona tulai mai le faigamalo a le National. Auā foi o le vaega lenei a le National ma le ACT o loo ave lava le latou faamuamua i le aufaipisinisi tetele.
