Ua luitauina le Loia sili lagolago a le faigamalo a Amerika Samoa ina ua maofa lana silasila a le ma lana aumalaga mai Tutuila o sui o se faalapotopotoga tumaoti o le MDRT (Multi-Disciplinarry Response Team) sa auai i le faamoemoe o le faalapotopotoga o le Toomaga mo Tagata Puapuagatia le Samoa Victim Support Group.
Faaalia e le tamaitai Loia sili lagolago lona maofa i le toatele o le atunuu, o faalapotopotoga tumaoti ma Matagaluega a le Malo o loo lagolagoina le tautua a le Toomaga i Samoa.
O lana faamatalaga o loo taumafai le latou faalapotopotoga e saili se lagolago faapea i le latou auaunaga e tai tutusa lava ma le galuega o loo faia e le Toomaga mo Tagata Puapuagatia.
O le faafitauli o loo feagai ma le MDRT e pei ona faailoa e le Loia sili lagolago, o le lē mafai lea ona maua uma faafitauli o loo aafia ai tamaitai ma fanau i sauaga eseese o loo aafia. E mafua lea tulaga ona o le malosi o le va tapuia o le nonofo ai o mātua ma fanau aemaise o le va o tagata e lē mananao e faailoa ni faaletonu faapea ona o le matamuli poo le fefe.
O le ese o le latou vaai i le tau faipati atu o tagata e lagolago le Toomaga mo Tagata Puapuagatia, na faaalia ai e le sui taitaifono o le MDRT le faletua o Ipu Avegalio Lefiti, o se luitau mo i latou pe a foi le faiga malaga, le galulue e faia talaiga faalauiloa poo awareness programmes ina ia maua ai le silafia e tagata i Amerika Samoa o le tāua o le latou auaunaga o loo ofoina e pei foi o le galuega a le Toomaga poo le Samoa Victim Support Group i Samoa Tutoatasi.
E pei ona silafia o le Toomaga mo Tagata Puapuagatia o se faalapotopotoga faato‘ā lima tausaga talu ona faatuina peitai o le mau a le aumalaga mai Amerika Samoa, e matuā ofo lava i le tulaga ua iai pe a fuafua atu ia latou foi galuega faapea i totonu o le teritori.
O le latou mau e ese le mataina o le malosi o le finau a le Toomaga ona e ui ina leai ni seleni, ae saili lava auala e faatino ai le latou auaunaga.
O le Multi-Disciplinary Response Team poo le MDRT o se faalapotopotoga e lei leva ona faavae i Amerika Samoa e feagai ma galuega i le tali atu i manaoga o i latou e aafia i sauāga tau feusuaiga poo sexual abuse.
O le tamaitai Loia sili lagolago a le faigamalo a Amerika Samoa le faletua o Mitzie Jessop Folau o le taitaifono ma o ia faatasi ai ma isi sui tamaitai e toalua o le faalapotopotoga sa valaaulia e auai i le fono faalauaitele a le Toomaga mo Tagata Puapuagatia ma ana paaga o loo latou galulue faatasi, lea sa usuia i le Aso Gafua, 30 o Me 2011 i le maota o Tooa Salamasina.
O Aperila o le tausaga nei na malaga ai le Peresitene o le Toomaga, le faletua o Lina Chang i se polokalame faalauiloa a le MDRT i Amerika Samoa, lea sa ia faailoa ai le auaunaga o loo latou faia i Samoa, atoa ai ma auala o loo latou sailia ai fesoasoani mo i latou e aafia i soo se ituaiga o mafatiaga.
Ua galulue felagolagomai nei faalapotopotoga e lua ina ia mafai ona ola ma maua se tali mo tagata sulufai atu mo se fesoasoani.
