O fesootaiga faatekonolosi ma auala eseese ua mafai ai ona fesootai tagata ma fetufaai foi faamatalaga aemaise o ata, o se itu tāua tele i nei aso ua vave ai fesootaiga. Ua fesoasoani tele foi i le fetufaai o tomai ma silafia pe a manaomia se fesoasoani i ni galuega, poo le auaunaga tau soifua maloloina, o faatoaga, faiga faiva aemaise o le atinae o tulisi poo tagata tafafao. I le pitolaau lava ia o faamatalaga ia vave ona faasalalau mo le silafia e tagata ua taatia mai ai o fesootaiga televavave faaonapo nei i auala ua faaaogā ai fesootaiga i le malosi ma le vave o le initaneti, ua iloa ai o loo telegese le silafia o tagata o le Pasefika i le faaaogāina o ia fesootaiga ua ta‘ua o le social media e pei o le Tweeter ma le Facebook.
E to‘a 22 sui mai nusipepa ma televise ma leitio faapea sui o galuega a le Malo ma faalapotopotoga tumaoti o loo feagai ma le faasalalauina o faamatalaga ua mae‘a se latou aoaoga sa faia i Noumea le laumua o Niu Kaletonia e faatatau i lea tomai. O Samoa sa auai foi ona sui (silasila i le ata) ma o ni tagata faasalalau sinia e pei o le tofa Apulu Laneselota Polu. E silia i le to‘a selau na talosaga e fia maua lea aoaoga ae na o le to‘a luasefululua na talia e auai. O le faaaogāina o auala vavave o fesootaiga i le initatneti e ese mai faasalalauga i leitio ma televise ma nusipepa, o se isi lea sitepu sili ona vave ma tāua mo auaunaga faapea.
O le alii pule o fesootaiga televavave faaonapo nei a le leitio a le Malo Ausetalia o le ABC o David Hua sa ia faatautaia le aoaoga lea sa matuā maofa ai sui auai i le tele o lona silafia i le faaaogāina o nei auala o fesootaiga. O le sini autu ia mafai e i latou o galulue i le faalauiloaina o faamatalaga ona faaaogā nei ituaiga o fesootaiga e lē gata ina vave, ae toatele foi tagata latou te silafia ma maua ia faamatalaga. O le isi itu tāua tele o le maketiina o se auaunaga auā e taugofie ma lelei foi seleni e maua ai pe a lelei ona pulea lona faafoeina.
O le mau a le toatele o sui o le aoaoga e matuā sili atu le faaaogā o fesootaiga nei e pei o le tweeter ma le facebook i o latou atunuu, ae na pau lava atugaluga e laugatasia ai o le totogi o le initaneti i atunuu o le Pasefika. I Samoa o le nifo tulimanu lea o le aufaipisinisi ma soo se auaunaga e faaaogā ai le initatneti faapea tagata taitoatasi o le taugata o le totogi. O nisi o leitio faasalalau i le Pasefika e pei o Samoa ua faaaogā le fesootaiga faapea e faaalu ai a latou faasalalauga ua maua mai ai e le toatele o tagata Samoa o loo aumau ma nonofo i isi vaega o le lalolagi, peitai o atugaluga lava o le totogi o le initaneti.
Faatu itutino mo galuega inisinia faatekonolosi
O le a maua e Samoa ma isi atunuu o le Pasefika fesoasoani i galuega tau i tomai tau inisinia mo galuega i fesootaiga faatekonolosi, ina ua faatu ai nei se itutino poo se faalapotopotoga a tagata inisinia o le Pasefika ua ta‘ua o le Pacific Engineering Group. O le mae‘a o se aoaoga e fā aso i le atunuu o Niu Kaletonia i le laumua o Noumea, na faavae ai ma lea faalapotopotoga lea ua avea ai se tasi o faauluuluga o ualesi ma leitio faasalalau i le atunuu le afioga Mapusua Corey Keil ma se tasi sui Pelesetene, ae filifilia le alii inisinia sinia o le leitio faavaomalo a Niu Sila o Steve White ma pelesetene. O sui o le laulau ua tofia i ai nisi mai le Pasefika ma Samoa o le susuga Su‘a Faumuina o le ofisa o le Pule Faatonu poo le Regulator ma le susuga Anthony Roebeck o le fale kamupani o le Samoa Quality Brodcsting lea o loo faagaioia faapisinisi le faletelevise o le TV1. O i latou ua filifilia i tofiga o lenei faalapotopotoga o loo i Niu Kaletonia mo le aoaoga i tomai faainisinia i fesootaiga faatekonolosi o loo faatupe e le PACMAS o se faalapotopotoga mo fesoasoani i galuega faasalalau ma tusitala a le Malo Ausetalia.
Faaalia e se tasi o sui auai o lenei faatasiga le susuga Su‘a Faumuina mai le ofisa o le pule faatonu, o le tāua o le faalapotopotoga ona e mafai ona galulue faatasi ai atunuu o le Pasefika i galuega faainisinia ma faasoa tomai ma silafia pe a iai ni faaletonu e feagai ma i latou o galulue i lenei tomai. O se tasi o aoaoga faapenei mo inisinia o galuega tau fesootaiga faatekonolosi sa faia i Samoa sa faatupe foi e le PACMAS.
