O se faaopoopoga lenei o ni fesoasoani mai i Malo Aufaatasi mo atumotu o le Pasefika o loo galulue i le taumafaiga e faaitiitia le faaaogā o malosiaga e aafia ai le siosiomaga ae saili malosiaga e lelei i le siosiomaga. O le fesoasoani atoa lava e mo le Atu Kuki, o Kiripati ma Samoa, o loo taumafai uma e faatino auala e maua ai malosiaga faanatura e aunoa ma le faaaogāina o le suauu mo le gaosiga o le eletise. Mo Samoa lava ia lea ua sau i ai le $300,000 (tala Amerika) poo le miliona tala Samoa. O loo iai le faanaunautaiga ina ia faamautu le gaosiga o le eletise mai i otaota o le siosiomaga i le atunuu.
Ua amata ona faaola le eletise i le tele o vaega o le atunuu, mai i afi ua ta‘i mai ai le eletise e maua mai i ave o le la e pei ona iai afi i Tanugamanono, le afi i Fiaga ua fafaga atu i nofoaga ua apoina le malamalama o le la i Vaitele aemaise o Salelologa. O lea ua faamautu i le vaiaso na tea nei e le Malo fanua e tolu auā le faalautele ai o ia ituaiga nofoaga mo le gaosiga o le eletise i ave o le la, ae o le fesoasoani lava lenei, ua agai ai i malosiaga e maua mai i otaota lafoai o le siosiomaga, ua ese mai i malosiaga gaosi i ave o le la. O le Faatonu o le Ofisa o le Siosiomaga o le Pasefika lea e ana le polokalame lea ua ta‘ua o le PIGGAREP ua sau ai lea fesoasoani, o ia na fai ma sui o le SPREP e saini le maliega o lenei fesoasoani ma le sui o Malo Aufaatasi i le atunuu ma le Pasefika.
Faaalia e David Shepperd, ua tele laasaga manuia ua vaaia le faatino i lalo o le polokalame lea e ta‘ua o le PIGGAREP, ia faaitiitia le kasa oona e aafia ai le siosiomaga mai i le gaosiga o malosiaga eseese. O Malo Aufaatasi i lona sui o Denmark lea ua patino i ai le tupe ua aumai mo lea atinae. O Tokelau ma Niue ia ua vaaia le ola i malosiaga nei ua maua mai i ave o le la, ma o le faamoemoe o Samoa ina ia oo atu i le 10% (pasene) le pa‘ū o le suauu e faatau mai e Samoa mo le gaosiga o lana eletise i le tausaga e 2016. O le Atu Kuki atoa ai Kiripati o le a maua le isi vaega o lenei fesoasoani auā lava le faatuina o nofoaga mo le gaosiga o le eletise mai i le la.
