“E tele i‘a o le sami, tele foi laau o le vao, tele manufelelei i le lagi, tele teine afakasi, ae sili ai oe la‘u pele, le lalelei o Samoa, mate maia la‘u tupua pe e te iloa le igoa”.
Le pese e masani na pesepese toatasi ai le faato‘āfaiavā na o ia ma talatalanoa i ona manatu faivavale, pe a tua ma ni ā le faigauo a o felāfoaina e peau fafati o lenei olaga, lea la ua tini lau o lo la faamoemoe.
Pei ua mafuli atu ni ao sa faauli mai atumauga ina ua mate‘ia le tupua sa natia i le loto o le alii o Solomona, inā oo maia se aso e faatasia ai ma lē sa ia filifilia e avea ma ana paaga i lenei lalolagi, ua lē gata o se uo mamae, o se fesoasoani, ae o se tagata foi e faasoa atu i ai ona lagona.
E leai lava se auro poo se penina e sili atu nai lo le taliaina e le alii poo se tamaitai o le alofa moni e faavae ai se mafutaga.
Tiga ona va i vasa ae lē mafai e vai ona tineia le alofa e pei ona momoo i ai se tasi o fatu pese, ua o ni lagona moni ia o le miti a Solomona ma Epenesa ua taunuu.
O le taeao o le Aso Toonai, 19 o Fepuari, sa osia ai le feagaiga ma sainia ai pepa o le maliliega i le va o Solomona Ah Ching ma Epenesa e faapaiaina ai i laua i luma o le Atua. Ua mae‘a foi la le toe pologa o le isi i mafaufauga sa tuufesili ai, a ua faaulufale atu le fiafia moni i le aiga fou.
Sa taitaia le sauniga e le faafeagaiga EFKS a Westside, le susuga ia Rev Lance Tautiepa pei ona auai ma le faletua ia Lite Tautiepa.
O le faitauina o le Afioga Paia a le Atua sa fofogaina e le susuga ia Rev Vaasili, Ekalesia Metotisi Uesiliana Dara. O Epenesa Lina Fili Kilisi Ah Ching e mai le alalafaga o Salelavalu ma le alii o Solomona Malaemoli Ah Ching mai Vaisala i Savaii.
O le fetalaiga ia Mumulu Tava‘e Televave o le tuagane o le tamaitai faaipoipo sa fai ma fofoga o le aso ma pulea le tausamaaga.
Sa tapenaina lava le fofoga taumafa e le Uncle Sam’s Catering, Poulava Sam ma Lorna Matautia. Manuia tele le aiga fou, Solomona ma Epenesa Ah Ching!
