O le vaiaso na tea nei na faato‘ā toe mafai ai ona faaola atu le eletise i le Faleaoga o le afioaga o Tanugamanono i le mae‘a ai o ni vaiaso talu ona motusia.
Ua mafua le toe faafoi o lea auaunaga i le faleaoga ona o le talosaga na faaulu atu e le Sui Faipule o le Vaimauga i Sisifo o se matai foi o Tanugamanono le Afioga Anauli Pofitu Fesili i le Malo, ina ia alofagia le faleaoga o le fanau talu ai o lea ua toe a‘e aoga ae e lē o ola atu le latou eletise.
Ua mafai la ona toe faaola ae ua talanoaina loa se faiga e faafaigofie ai ona totogi atu e le aoga poo le nuu foi le pili o le moli a le Aoga.
Faaaila e le faauluuluga o le Malosiaga tau Eletise, ua leva ona finau le Faalapotopotoga ma le afioaga ona o le lē totogia o le latou pili o le eletise.
Peitai e lei iai lava ma se usitaia o lapataiga a le Aoga. E aofia ai foi i le motusia o le Eletise, le Malumalu o le Ekalesia Faapotopotoga Kerisiano Samoa atoa ai ma le Malumalu o le Ekalesia Metotisi.
Faaalia e le sui lea o le EPC o lea la faato‘ā mafai ona talanoa mai le afioaga i le faapipii lea o le Cash Power mo nei nofoaga faitele e tolu i totonu o le nuu. E iai vaega o Tanugamanono o loo ola fua le eletise o loo maua ma o aiga ia o o latou eleele ia o loo taatia sa‘o ai lava le afi tele lea o loo fafaga atu ai le Eletise i le tele o le motu o Upolu.
O le finauga ua tele tausaga o vaaia ma ua oo foi i le Faamasinoga ma le Palemene, o le manaoga o le afioaga ina ia maua uma e le nuu lea faamanuiaga ae lē na o se vaega o le afioaga.
E ui i ia finauga uma, o loo mautu lava le finauga a le EPC e lē mafai ona o loo tele foi isi afioaga o loo taatia talosaga faapea ona o loo faaaogā e le Malo e ala i lana kamupani lea o le EPC fanua ma le suavai o ia afioaga mo le faatinoga o le gaosiga o le eletise.
E masalomia o le mafuaaga lava lea o le lē totogia o le pili o le eletise a nei nofoaga ae ua iu ai ina motusia mai ai loa e le EPC lea auaunaga.
O lea la ua talanoa le taofi loa o le auaunaga i lona faiga masani e fua atu le pili i le faaiuga o le masina ae ia see loa i le cash power.
O le afioaga o loo ola fua le tele o ona aiga i le eletise, o Magiagi. Ua silia i le 10 tausaga o faia lea tulaga ma ua fā minisita o le EPC o taumafai mai feutagaiga ma Magiagi i le toe foi i le totogi o ana pili ona o le manatu o le Malo e le talafeagai tele lea tulaga pe a fuafua i isi afioaga o loo iai meatotino a le Malo, e pei la o Tanugamanono.
O le tali o loo tumau mai ia Magiagi, se‘i talanoa le nuu, ae o loo tele vaega o le afioaga e lē o mafai ona fai ai ni galuega atiae ona o loo ua ave uma e taatitia ai ogapaipa, o faatanoa faapea ai afi laiti sa fausia ai e le EPC.
O loo taatia lava foi se isi mataupu na ofo ai fanua i aiga o Magiagi e fesuiai ai ma fanua o faaaogā e le Malo ae mae‘a ona ta e le afioaga fanua ae agai le afioaga sa iai ia fanua, o Siumu ma ave le Malo na ofo atu lea fesuiaiga i le Faamasinoga ma manumalo ai Siumu e toe faafoi atu o latou eleele na tau ave i Magiagi.
E fai lea faaiuga ua mautu atoa le vaega o Tiavi na tufa i ai fanua nei ma ua mamā atoa i le taina ua sauna tagata Magiagi o le a atia‘e loa ia eleele.
Na taatia mai ai lava ma eleele nei ae toe foi i le saili o se maliega ma le Malo.
O le finauga a le Malo na faato‘ā mae‘a atu nei, o lea o loo tali atu lava i isi atina‘e o loo manaomia e Magiagi e pei o le auala na tele se galuega toe faaleleia na fai i ai i le pito i tai o le nuu, ma ua tatau nei loa ia Magiagi ona tali ane e ala i le agai loa i le cash power, ae e lei toe maua lava la se tali a le nuu e oo mai i le taimi lenei.
O le suavai foi o Magiagi e lē o totogia ae o se faitau miliona tala na ta‘ua e le Pulega o le Suavai e mafai ai ona fausia ni nofoaga e faamamā ai le suavai o loo inu ai lea afioaga.
Ma o le taimi lenei o loo sau sa‘o le suavai faaaogā o Magiagi mai i le vaitafe. Mo Tanugamanono, o lea ua toe foi e totogi le eletise.
O le isi afi tele o loo galulue ai nei le EPC i le taimi lenei o loo ua faataatia i Aleisa.
O le isi tulaga na faaali ai le lē fiafia o le EPC ia Tanugamanono ona na maua i asiasiga a le Faalapotopotoga, o loo iai ni aiga ua o latou taumafai e sui le mita lea o loo fua ai le malosi o le eletise ma le tele o lea malosiaga ua faaaogāina e aiga. E iva aiga o Samoa ia ua suesueina ma ua ave e le EPC i le Tulafono ona o nei faiga.
O se tasi lenei o faafitauli ua vaaia le tulai mai i le auaunaga a le EPC.
