O le Faiaoga ma lona tauaveina o tiute ma galuega faafaiaoga mo le All Blacks a Niu Sila, o se galuega maualuga ma le taualoa.
O se galuega foi e tufitaufao, ma e lē mafai ona pasi e soo se isi lava e iai agavaa faapitoa. O le avanoa e tulitulimatai e le toatele o tamafanau a Niu Sila, faapea foi nisi mai fafo.
Ae o le vaai foi ma le silasila a le Iuni lakapi a Niu Sila, e lē soona filifilia i ai se isi, ae filifili tupetoa. E faigata foi lona sailia, ona talu ai lava o se galuega aupito maualuga i le faitauina o galuega i le atunuu.
O le All Blacks ma le taaloga lakapi, o se taaloga e manatu Niu Sila, o lana lea taaloga e lauiloa ai i le lalolagi.
O le ala foi lea e maaleale ai finagalo o le Iuni lakapi a le atunuu, ma e anagata ai lana filifiliga mo soo se tasi lava e fia talosaga i ai, ma agai i ai se filifiliga tatau ma talafeagai.
Ua faalauiloa le oso ese o Graham Henry mai le tofiga, ina ua mae’a ona uu e Niu Sila, le Ipu autu o le lalolagi o le 2011.
Ae o le faalauiloa ai o le faamavaega a Henry, sa i pulega lava a le Iuni lakapi a Niu Sila, le faitalia e faafeiloai muamua ai nisi o loo naunau i ai, a o lei faasalalauina le avanoa.
E iai igoa sa silasila i ai le Iuni lakapi, ma sa valaauina foi ma faailoa i ai le manaoga o le Iuni, ma o le alo o Samoa le isi sa valaauina, o le susuga ia Pat Lam.
Peitai sa logo mālie i le faalogologo le talanoa mai a le alii Faiaoga o le Auckland Blues, le susuga ia Pat Lam, ina ua fesiligia pe sa manatu i le tulaga Faiaoga mo le All Blacks a Niu Sila, ina ua mapuna a’e le faamavaega a Graham Henry mai lea foi tulaga tāua.
O le vaiaso lana na tea nei, na maua ai le feiloaiga ma le susuga i le faiaoga o le Auckland Blues, le susuga ia Pat Lam.
O le saunoaga a Pat Lam, sa ia ta’ua ai e faapea e lei iai sona manatu i lea tulaga. E ui lava foi ina sa faailoa ane ia te ia, ma valaauina lona tagata mo lea avanoa tāua, peitai e iai vaega e sili atu foi lona tāua, sa mafua ai lona teena o le avanoa, ma lona talitonuga e iai lava lona taimi, ma le filifiliga o loo agai mai mo le galuega.
Fai mai Pat Lam, e lei faafuaseia lona tagata ina ua valaau ane le Iuni. Fai mai a ia, ua leva ona mae’a na tapena lana tali, ma faia foi lana faaiuga mautu, ma o le ala foi lea na faasasa’o ai ma vave ona faamatuu lana tali e tusa ai ma le manaoga.
E toatele i latou sa tulimatai ma faatalitali avanoa i le galuega. A o lea foi toatele sa iai lava nisi sa faailoa o latou manaoga, a o nisi foi sa faaulufaleina e nisi e atamamai ma faafoeina le tulaga o le lakapi i totonu o Niu Sila.
Sa ta’ua le alii o loo avea ma se tasi o le toatolu sa manumaloina le Ipu o le taamilosaga 2011, Steve Hansen.
Sa ta’ua e nisi le alii sa faiaogaina le ‘au a Uelese, a o nisi foi sa toe mafaufau i le alii o Robbie Deans. Ae sa lotolotoi ai ma le tamafanau a Samoa, le susuga ia Pat Lam.
E tāua tele Aukilani (Auckland Rugby Union)
O le finagalo moni lea ma le autu o manatu o le susuga ia Lam. O le atina’e ma le faafaileleina o le lakapi mo tupulaga fai a’e mo le lumanai o le taaloga. O le sini ma le autu tonu lea o lana galuega o loo iai nei.
E lē gata ina avea o le faiaoga mo le kalapu ma le Auckland Blues, ae o le fesoasoani mo tupulaga fai a’e i le taaloga, e mautinoa o le lumanai manuia lea, ma le alualu pea i luma o le taaloga i totonu o le atunuu, aemaise lava o Aukilani.
Saunoa Lam, ua tele ana galuega tetele, ma sa galue malosi foi mo le atina’eina ma le lalagaina o talavou mo le faamoemoe o le Iuni a Aukilani.
E lē gata i lea, ae sa galue malosi foi e faia faatosina, ma tauanau mai le toatele o tupulaga Pasefika ma soo se tasi o loo iai le taleni, ina ia faaaogā avanoa mo le ‘au a Aukilani ma le Iuni.
E iai foi nisi o galuega ua mae’a ona tapena, ma ua na o le sauni lava e faatino ma faagaioi loa.
O lona manatu e ao lava ina toe nofo e faaauau ma faatino lana galuega sa amataina, a o lei ofoina ma laasia le isi laasaga o lana tautua i le galuega faafaiaoga mo nisi kalapu, faapea ma le ‘au tele a Niu Sila le All Blacks.
Fai mai Lam, o le a tele se suiga o Aukilani o le a iai, ona o galuega tauatia’e sa faia ma totoina i tausaga ua mavae.
E lē gata i lea, ua mafana foi le mafutaga ma le toatele o tama taalo, aemaise o le pulega o le Iuni, ma le va ma isi foi pulega. O nisi ia o mafuaaga sa manatu ai, o le iai lava lona taimi mo lea tofiga tāua.
O lana mau, e lelei le oo atu o lana tautua i le isi laasaga pe a oo mai lona taimi, a ua toatele alo ma tupulaga sa faamaonia ana galuega atoa ma le molimauina i auala sa latou galulue faatasi ai i le tele o taimi. O le isi lea auala o le a faafaigofie ai mo le galuega faafaiaoga.
Saunoa Pat Lam o le isi lea pogai o le lelei ma le manuia o se taumafaiga, ona o le lelei ma le mafana o le sootaga i le va o le faiaoga, ma tama taalo. O loo ave pea le faamuamua a le susuga ia Lam, i le Iuni a lona itumalo i Aukilani ma lona atina’eina.
