O loo matuā teena e le afioga i le Ofisa Sili o le Faalapotopotoga o le Malosiaga Tau Eletise, Tologata Tile ni faamatalaga e faapea, na faaletonu le totogi o ovataimi a le toatele o le aufaigaluega a le EPC talu mai le afā o Eveni.
O lea ua ta‘ua e nisi o le aufaigaluega o le vaiaso na tea nei faatoa maua ai ia ovataimi ma e masalomia o le leotetele o faitioga a le aufaigaluega na faatoa gaioi ai loa le faalapotopotoga e totogi atu ia itula faaopoopo i totogi o le aufaigaluega.
O le toatele o i latou na faitio, o alii o loo faigaluega i le vaega o le au tosolaina a le EPC. E oo mai foi o latou totogi faaopoopo ae ua ta‘ua e nei sui o le EPC, o loo talosagaina le taofia o le faalauiloa o o latou suafa, e matuā lē fetaui lava ma le tele o vaiaso na faigaluega ai ma itula na ave i le taumafai lea e faasoo le eletise i le atunuu na matuā
faaleagaina i le afā.
O le tele o nei galuega na faia i le pogisa ma le timuga ae ua matuā lē talafeagai le taui ua avatu e pei ona ta‘ua e nei sui faigaluega. Na tapa se finagalo o le alii ofisa sili, Tologata Tile ae na ia ta‘ua o le taimi lenei e lei mae‘a ona totogi itula faigaluega o tagata faigaluega uma lava seia vagana ai le Pulega ma e mafua mai i le lē sa‘o o itula o loo tusi atu i taimi na galulue ai nisi.
Faaalia e le alii ofisa sili o isi taimi ua ta‘ua ai le galulue o nei tagata i itula e 24 mo aso sosoo e fitu.
“E leai se tagataola e mafai ona faigaluega faasolo atoa e lē moe pe malolo, ona o tagata faigaluega uma lava o lenei faalapotopotoga, o loo feauauai ma galulue i sifi, ma o tagata o loo totogi alauni ovataimi e lē maua ni a latou ovataimi e pei ona ta‘ua e nisi o le aufaigaluega”.
Faaalia foi e Tologata o faamatalaga e faapea na teteva nisi o tagata faigaluega i o latou aiga i le vaiaso ua mavae ina ua maua atu ovataimi e lē moni.
Ta‘ua e le alii ofisa sili, o le vaiaso nei o le a faauma ai ona totogi atu ovataimi a tagata faigaluega ona o loo faagasolo lava pepa a le vaega e faia totogi mo le EPC.
