O Samoa le atunuu ua numera tasi i Niu Sila i le maualuga o le aofaiga o ona tagata o loo nonofo ma aumau a ua aafia i faiga solitulafono i mataupu tau femalagaiga.
O le taunuuga lea o se lipoti ua faalauiloa nei i lea atunuu ma ua faaalia ai e numera tasi Samoa, tulaga lua Initia, sosoo ane ai Niu Sila ma Somalia faapea ma Fiti.
O faiga solitulafono tau femalagaiga ua aafia ai le faiga o pepamalaga ma tusifolau i le sefulu tausaga ua mavae ma e to‘a 22 tagata mai le Pasefika na molia ma faamaonia ai, o se aofaiga e tusa ma le 15 pasene e fua i le 145 o mataupu faapenei e faamaonia i luma o le faamasinoga a le atunuu.
O le 145 o mataupu tau solitulafono i gaioiga tau femalagaiga o le 128 o mataupu e aafia ai faiga taufaasese i faamaumauga mo le maua o se tusifolau ma faiga solitulafono i le suia o ata o tagata e fia maua ni tusifolau.
Faaalia e se ofisa sinia o femalagaiga a le Malo o Niu Sila e tusa ma le 70 mataupu tau faiga solitulafono i aiaiga tau femalagaiga e lipotia i masina taitasi.
E pei ona silafia se tasi o mataupu e lei mamao atu tausaga na aliali mai ai, o se ofisa malaga o se tina mai Samoa na iai foi lona ofisa i Apia sa toatele na sailia mo le toe fia maua o a latou seleni na totogi i ai mo le faagaioia o pepa nofomau ma saili ni pepa faigaluega ina ua laki i le nofomau i Niu Sila, ae na fiu e saili ua alu ese ma Samoa.
E lē na o le pau ai lea o ni mataupu, auā e oo lava i nisi i totonu lava o Samoa ua molia ai foi i ia faiga solitulafono e pei o se tasi o mataupu o le a suesueina e le faamasinoga i le tausaga nei faasaga i se alii e pulea se ofisa malaga sa faatuina i se vaega o le taulaga i Apia.
O nei faamaumauga o loo faaalia ai, e na o le toatasi lava se tasi e faia se solitulafono faapea mai isi atunuu e pei o Tuvalu, Ghana, ma Bulgaria. O le sefulufitu o nei moliaga, o loo maua ai e sa‘o lava le tusifolau sa faaaogā, ae sese pe solitulafono le auala na mafai ona maua ai na tusifolau.
E lē o faailoa maia e le ofisa o Femalagaiga a Niu Sila pe toafia nisi mai le to‘a 145 o i latou ua faamaonia le aafia i nei faiga taufaasese, ua toe tipoti atu i o latou atunuu.
Ta‘ua e le pule lagolago o le vaega a le matagaluega o loo nafa ma le itu e suesueina ai nei mataupu, Peter Elms, e lē faigofie le tau sailia mai o fuainumera ma‘oti mai nei mataupu uma e 145. Pau le itu na ta‘ua e Mr Elms, e tusa ma le 70 ni tuua‘iga faapea o faiga taufaasese i mataupu tau femalagaaiga e tuuina mai i le latou ofisa i masina taitasi.
O se faasalaga umi lava ua faia i nei moliaga o faiga taufaasese i pepamalaga, o le lua tausaga ma masina e iva, e pei ona falepuipui ai Sahra Ismail i le tausaga e 2011.
O Ismail na taunuu i Niu Sila i le 2002 o se tagata sulufai mai Somali, ma mulimuli ane sa faamaonia le avea ma tagatānuu sitiseni o Niu Sila.
Peitai na toe mulimuli ane, e sese igoa ma faamaumauga ia sa ia faaaogā e oo mai ai i Niu Sila, auā o le taimi lena o lea sa avea ma tagata sulufai i Holani ma ua avea ai foi ma sitiseni o lena atunuu.
E tusa ma le 12 tausaga o nofo ai lenei tamaitai i Holani, ae sa lei talia e le malo Holani ana taumafaiga e avane lona aiga mai Somali ina ia latou nonofo faatasi i Holani.
Ina ua avea Ismail ma sitiseni o Niu Sila, sa apalai ai i le 2004 mo le auina mai o le toafitu o tagata o lona aiga o ni tagata sulufai, ina ia latou nonofo faatasi i Niu Sila, ma sa talia lana talosaga.
Ua ta‘ua i lenei lipoti le tele o se seleni a le malo e mafai ona sefe mai, pe a taumafai e alofia nei ituaiga o soligatulafono o le faia o faiga taufaasese i pepamalaga.
