Na faatumulia le maota i Malaeola ina ua faapotopoto ai Autalavou uma a le Ekalesia Katoliko Samoa i Aukilani, i le aso 22 o Iuni 2013, mo se aso faapitoa faaletausaga e pei ona latou faatulaga ai se tauvaga o Pese & Siva, i lalo o le ‘au‘au: “Tupulaga Taofi Mau Lau Aganuu”.
O nisi o ipu faapitoa sa foaiina faameaalofa mai e nisi aiga o le ekalesia e fai i ai faailoga autū o lenei tauvaga. E pei ona iai le ipu sa foai mai e le Aiga o Muiava Family, e manatua ai Suemalo Tua Muiava. O le ipu lea sa faia ai le faailoga mo le tauvaga o Pese.
O le isi ipu sa foai mai e le auaiga, Ah Chong Family, sa saunia ai le faailoga o le manumalo i le Sāsā. Ae o Henderson na saunia le faailoga mo le Mauluulu.
O le tanoa paluava sa foai e le aiga o Tanuvasa Family, e manatua ai le Tofaeono Tanuvasa Tavale, ua tuua le malo.
O autalavou na manumalo i faailoga autū o lea aso: O le Pese na manumalo ai le Autalavou a Mangere Central. O le Sāsā na manumalo tutusa ai le Autalavou Mangere East & Autalavou a Manurewa. O le Mauluulu na manumalo ai le Autalavou a Panmure.
O faamasino o lenei tauvaga, o le Afioga Maiava, Tauanuu Tapu, Seve, Francis, Faalepo & Keneti Muiava.
Na momoli le faamalo i le Ofisa Aoao Autalavou Malaeola mo le galuega fita i le faamaopoopoina o lenei faamoemoe mo talavou uma o le ekalesia, aemaise o le agaga moni na mafua ai lenei faatasiga, ina ia toe faaolaola ma faamanatu i loto ma agaga o fanau a le ekalesia, le tāua o le taofimau i la latou aganuu, o tu ma aga e masani ai le tama ma le teine Samoa, o lona faasinomaga lea poo fea lava le itu o lenei lalolagi ua aumau ai.
E ui lava na iai autalavou na patino i ai nisi o faailoga na manumalo ai, ae i le iuga o lea aso ma le faamoemoe na alo atu i ai le ekalesia, sa manumalo uma lava autalavou uma na auai, a o faaali mai i o latou foliga fiafia ma le naunau e faatāua sa latou aganuu, o pese ma siva e iloa ai i latou o ni alo ma fanau a Samoa i totonu o lenei atunuu o Niu Sila.
