“Ou te lē toe faatagaina outou pe a tou lē usitaia la‘u faaiuga”
O taualumaga a le Palemene i le vaiaso ua mavae sa molimauina le siisii o le tai i finagalo o le taitai o le Malo i le Palemia ma taitai o le Itu Agai aemaise foi o finauga i le fefaaaliaiga o finagalo o sui faipule o le itu a le Malo ma le itu o loo agaia le Malo ona o le soalaupuleina o le tala autū o le tupe 2013/2014.
O felafolafoaiga a le Fono Aoao sa molimauina ai foi nisi o lafoga ua fai si malolosi. O le lipotia ai e tusitala o taualumaga nei e faavae mai i saunoaga a faipule i totonu o le maota fono faapea le toe faatalatalanoaina o nisi o faipule i fafo mai o le Palemene. Ua faaalia ai e le Fofoga Fetalai le susuga Laauli Leuatea Polataivao, na te lē toe faatagaina tusitala e nofoia le Maota Fono mo a latou lipoti pe a latou lē usitaia lana faaiuga.
O le faaiuga a le Fofoga Fetalai ua ia ta‘ua ai le nusipepa o le Samoa Observer ona o se lipoti na faasalalau ai ni lafoga na faia e le Palemia faasaga i le sui taitai o le Itu Agai le afioga Aeau Peniamina lea na saunoa ai le Palemia ma tuua‘ia le sui taitai o le Itu Agai i le faasuaava atu i le fono.
O nisi foi o lipoti a se tasi o faletelevise sa lipotia ai se saunoaga a se tasi o faipule o le itu a le Malo le tofa Lafaitele Patrick Leiataualesa, na ia faafetaia ai le faaiuga e aveesea faipule sa avea ma minisita lagolago o le Matagaluega o Tupe. O le finagalo o lea faipule o le HRPP e faapea o se faaiuga ua talafeagai ona e lē tatau i ia minisita lagolago ona saofafai i le komiti o tauofoga ae e iai a la pisinisi.
O le finagalo o le Fofoga Fetalai e faapea, e lē tatau ona lipotia e tusitala ni saunoaga e lē o i totonu o faamaumauga aloaia a le Palemene poo le hansard. O lona finagalo foi e faapea e na o faamatalaga lava o loo faamaumauina aloaia e tatau ona lipotia ma sa ia fautuaina ai faipule i le faia o ni saunoaga i fafo atu o le Palemene i tusitala e ese mai i taualumaga a le fono o loo aloaia ona faamaumauga.
O le pogai lea o le tulai o le taitai o le Itu Agai ma ia fautuaina le Fofoga Fetalai ona e foliga o le a aafia le aia tatau o faipule e saoloto ai le faaalia o o latou finagalo aemaise le aafiaga o le aia tatau a tusitala e faatino ai le latou galuega.
Peitai na saunoa le Fofoga Fetalai o loo saoloto lava faipule i le faaali o manatu i tua mai o le Palemene, ae o lana faaiuga e ao i le aufaasalalau ona usitaia tulafono tumau o loo faatonutonu ai le lipotia o taualumaga a le fono aoao faitulafono. Ua ia lapataia foi e ala i se faamanatu i tusitala ma le aufaasalalau aiaiga o le tulafono e mafai ai ona molia ma faasalaina se tasi i le lē sa‘o ona lipotia taualumaga faapalemene.
Ua faaalia e le tamaitai tusitala na lipotia felafolafoaiga na ta‘ua ai le faasuava o le sui taitai o le Itu Agai, sa ia fesiligia le Fofoga Fetalai ae e lei ma‘oti atu i lona finagalo poo gafea tonu o le lipoti ua faaletonu. “Na pau lana faamatalaga e faatali se‘i avatu lana press release ma le tusi”, o le tala lea a le tamaitai tusitala o Lanuola Tupufia. O le amataga o lenei vaiaso fou ua toe faaauau ai taualumaga a le Palemene ina ua mae‘a pasia le tala autū o le tupe.
