E faitaulia uma e le Atua o tatou taimi o loo tatou faaalu pea mo Ia aemaise o mea lelei o ta‘ua ai lona Suafa Paia.
E iai ekalesia a le faapotopotoga a le Atua AOG, le Matagaluega o loo taitai ai le susuga ia Ps Vanu Toma sa lē faataunuuina ni a latou sauniga masani i le Aso Sa o le vaiaso ua tuanai atu nei, 29 o Aukuso ona sa valaaulia faapitoa e fai sauniga faatasi ma molimauina tauvaga a le ekalesia AOG a Kingston i lalo o le taitaiga a le taitai o le CA le susuga ia Sola Tavete.
O le faafeagaiga taulagi o lea Ekalesia o se lupe faalele mai Matautu Falealili – Ps Manuula Nai ma le faletua ia Foloi Nai mai Lona i Fagaloa.
O lenei tauvaga e faatasi i le tausaga ma faia ma sa valaaulia faapitoa nisi o ekalesia a le matagaluega e pei o le taitai o le Matagaluega le susuga ia Ps Vanu ma Va Toma, ma nisi faafeagaiga, Ps Tupou Vaafusuaga ma Ps Lilo Tolopaepae ma a latou ekalesia, faapea le tele o valaaulia.
E tolu (3) ‘au poo Teams sa vaevaeina i ai le ekalesia malosi a Kingston, o Apeteniko (taitai: Terry Filimaea Faueā), Sataraka (taitai: Aleli Ah Chong), ma Mesako (taitai: Faga Mafo‘e) ma o vaega sa tauvā i ai e aofia ai le togiga, pese savali, pese viiga, pese faitaga, ma le tala ia Esau ma Iakopo.
Sa mataalia faamasino i le faatautaia o le faamoemoe ma maua ai le iuga, manumalo ai le ‘au a Apeteniko lea o loo iai le susuga i le faafeagaiga ia Pr Manuula ma Foloi Nai i le tuuaofaiga atoa, tulaga lua le ‘au a Sataraka ma le lona tolu o Mesako. Na maua le talita lapoa e le ‘au sa tulaga muamua ma le ipu faapea isi ‘au o ipu lapopoa foi.
Na matagofie lea faatasiga i le faatumulia i le paia o le auvalaaulia, ma na mamalu le aso i faaaloaloga masani sa faatinoina.
O le taulaga sa tauaaoina e le paia o le ekalesia e foai mo le galuega a le Matai ma faagaioiga a le ekalesia e tusa ma le sefulu afe ma ona tupu talā.
O le susuga lava ia Sola Tavete sa fai ma fofoga o le aso. Na faaiuina lava i se taumafataga mamafa sa tapenaina e le ekalesia auā le aufaigaluega a le Atua ma ē sa valaaulia.
