O le laalaa i luma ma le tulai mai o tamafanau a Samoa i tulaga tau taaloga ma soo se faamoemoe, e ui lava ina eseese tupuaga ma nofoaga, ae o loo tautaua ai lava si o tatou atunuu o Samoa, e mimita ai lava le agaga ma taunuu ai se tasi o muagagana “Ua ta fia Falealili fua”.
E mafua ona laasia e se tasi se sini o se tausinioga, ona ua tuuina atu atoatoa le malosi, loto ma le agaga e faataunuu ai se manaoga e pei ona faamanuiaina ai lenei alo o Samoa, le tofa ia Faalavelave Frank Frost.
O le tausaga 2009 na amata faatuina ai le kalapu fusu a Frank Frost Taekeondo Australia i le pitonuu o Hillcrest, ma ua faaigoaina lava i le igoa o le faiaoga sinia, Master Frank Frost 5th Dan Black Belt Head Istructor.
O se faamoemoe sa moemiti ma tatalo i ai le tofa ia Faalavelave Puipui Frank Frost, i lona Matai e ona le taleni ua ia filifila, ina ia faatautaia lava e ia lana Kalapu, ma faaigoa i lona suafa, e aunoa foi ma se toe galue i lalo o se isi Master.
Ua savalia nei le 28 tausaga talu ona koleni Frank i lenei taaloga seia oo mai lava i le taimi nei, ma ua iai foi lona agavaa ma lona silafia lelei o itu uma, mo le a‘oa‘oina o lenei taaloga.
Ua avea foi o ia o se uluai tamafanau a Samoa ua ia umia lenei tulaga maualuga i Ausetalia nei i le taaloga o le Taekwondo Martial Arts.
E lē gata i lea ua faamanuiaina ai ma ona alo e toatolu, ua umia fusi uliuli (Black Belts) i lea foi taaloga, ona o lona naunau lava ia faaauau e nai ona alo le taleni na foaiina i ai e le Atua.
O Yvonne Emily Lowndes nee Frost 2nd Dan Black Belt, 25 tausaga. Alfred Joseph Frost 2nd Dan Black Belt 20 tausaga, ma Alexander David Frost 1st Dan Black Belt 14 tausaga.
O alo nei a Frank o loo galulue faatasi i koleniga a le latou Kalapu, lea o loo faia nei i Hillcrest i po o Aso Gafua ma Aso Tofi.
O le tāua tele o le silafia o lenei taaloga e lē gata o le taleni ae mafai foi ona puipuia mai ai oe mai faafitauli pe afai e ono lamatia oe i faalavelave a o lava au meafaigaluega.
O le Aso Sa, aso 22 o Aukuso 2010, sa faia ai se taamilosaga a le Kalapu a Yun Hap Taekwondo Qld, ma sa tauva ai le susuga ia Frank i le vaega a le Maters, talu ona malolo mai o ia mo sina taimi umi, ona o lona fiafia pea e tauva a o talavou lona soifua, ma na ia iloa ai, e lē sese lava le muagaga, e toeaina lava le pusi ma lana fela‘u, ma o lea na ia toe oso ai i le maea, ma faamanuiaina ai lona taumafai ina ua manumalo i le pine auro.
I le mae‘a ai ona tauaaoina e le susuga ia Frank o lea pine auro, na ia manatu ai e sili pe a sami ma faamanatu ai loa le tasi tausaga talu ona faavaeina mai lana tautua, e pei ona faataunuuina i le afiafi o le Aso Tofi o le vaiaso ua tuanai.
Sa tauaofia uma tamaiti ma o latou mātua faapea nisi o uo ma aiga mo se taumafataga o sina papakiu e faamanatu ai le atoaga o le tausaga i Kuiniselani.
