Ua faaiu le masina o Setema ma ni faalumaga lelei o le taufaaiuiu o le tausaga, i se tauvaga matagofie a le autalavou a le Ekalesia Metotisi Samoa i Panmure, sa faia i le Aso Sa na tea nei i le taimi o le latou sauniga lotu i le aoauli.
O se vaaiga matagofie le sagisagi fiafia o le tupulaga e faamaopoopo i le itu faaleagaga ma fiafia i le faatinoga o vaega o le autalavou i totonu o Ekalesia e ala i tauvaga faapenei.
O le tauvaga muamua lea o lenei tausaga a le autalavou, e pei ona silafia o le Ekalesia Metotisi Samoa Panmure o loo taitaia e le susuga i le Faafeagaiga Rev. Ierome Pio ma le faletua ia Maraea Pio.
E lua vaega sa vaevaeina i ai le tauvaga a le autalavou, o Esekielu ma Tanielu. E lei alu tamala le tapenaga ma sauniuniga a le autalavou faapea le Ekalesia i ona itu uma, e mai lava i le fanau laiti seia oo lava i nai tuaa sinasina, sa galulue faatasi i le tuufaatasia o lenei faamoemoe ma le onomea i taaga eseese o aitema na faatinoina i lea aso.
O vaega sa lautogia i ai le faaiuga ma le faamasinoina, e aofia ai le pese lotu, o le taulaga, o faaevagalia faapea ma le ‘au e matagofie le togiga, ma le autū o le tauvaga ‘O le Amiotonu a le Atua e maua ai le filemu’.
E taaga eseese le mananaia o tapenaga a le autalavou, ma o se aso faapitoa foi mo le toatele ua maua ai le avanoa e siva ai i luma o mātua ma le Ekalesia, aemaise e lē o se tulaga faigofie le taumafaiga mai o le tuufaatasia o le faamoemoe. Tele foi se taimi sa tau faaleleia ma tapena ai togiga a le fanau, ae ua maualuga le Viiga o le Atua ina ua tini pao le utu, ua tau lau o le faamoemoe, ma ua faaiuina ma le manuia le tauvaga.
E ui ua o se tauvaga, peitai o se avanoa lelei foi sa fai ai le fanau ma feau momoli o le talalelei mo le Ekalesia, faapea malo asiasi sa auai i le faamoemoe o le autalavou. O le iuga lava o le tauvaga i lona aotelega e tutusa uma vaega e lua, o le ‘au a Esekielu na manumalo i le pese lotu ma le taulaga, peitai o le vaega a Tanielu na sola ma le manumalo o le faaevagalia ma le matagofie o le lelei saunia o le latou togiga.
Toatele foi nai uo na valaaulia o i latou na molimauina le faamoemoe o le autalavou Metotisi Samoa i Panmure.
