O loo iai faaletonu i aiaiga o le tulafono e faamalosia ai le ave o fanau i le aoga, ma o le molimau lea a le Pule Sili fou o le Matagaluega o Aoga, le afioga Matafeo Tanielu Aiafi, ina ua maua sona avanoa e talanoa ai ma le tusitala.
“E matuā lē lelei lava le tulaga o loo faamalosia ai le tulafono, ma e lē faitioina foi nai leoleo o loo pei o latou o loo faamalosia le tulafono”.
O fanauiti o loo vaaia i le taulaga i taimi o loo fai ai aoaoga a isi fanau o le atunuu, o se molimau ola lea o le lē mafai e aiaiga o iai o le tulafono e faasino ia i latou e faamalosia le tulafono ona mataitu fanau o loo feaoai solo e faatau soo se oloa, ae ua lē ulufale i se aoga.
O nisi o fanau e masani ona vaaia i le taulaga o lo latou matutua o le 8 i le 10 tausaga ae e iai foi ma fanau faatoa ta‘i lima pe ono tausaga le matutua.
“O le pitolaau a leoleo e tāua ae e tele foi isi o latou tiute tāua, ma e faigata foi i le latou galuega pe a feagai ma ni mātua o se tamaitiiti ua maua ua lē alu i le aoga”.
O le mafuaaga lea o le tapena e le matagaluega o aoga, taaloga ma aganuu o se feiloaiga ma sui o le Matagaluega o leoleo ma falepuipui, le ofisa o le Loia Sili, ma le Matagaluega o tina ma tamaitai atinae o nuu ma afioaga ma aga fesootai, ina ia toe silasila i aiaiga o le tulafono ma se auala e sili ona lelei e faamalosia ai le ave o fanau i le aoga.
“E iai lo‘u talitonuga e tatau ona iai se isi auala e sili atu ona malosi ma lelei e faamalosia ai le tulafono”, na saunoa ai le Pule Sili.
E iai le naunautaiga o le faauluuluga o le Matagaluega o Aoga, Taaloga ma Aganuu o le a mafai ona faamalosia aiaiga o le tulafono i se faiga e mafai ai ona logosaia ma usitaia e mātua poo i latou o vaaia ni fanau le autū o le faamoemoe o le Malo na fausia ai lea tulafono, ia aooga uma fanau a le atunuu ma ia aoaoina lelei auā so latou lumanai manuia aemaise o le ute lea o fuafuaga a se Malo ia aoaoina fanau.
E lei faailoaina mai e le afioga Matafeo Tanielu se aso ma se taimi o le a faia ai le feiloaiga ma le Loia Sili, Komesina o Leoleo ma le faauluuluga o le Matagaluega o Tina ma Tamaitai, ae o le molimau ola lava o le lē usitaia e nisi o mātua o le tulafono ua pasia, o le faamuamua ona ave fanau e faatau solo i le taulaga oloa eseese ma fua o faatoaga, ae lē avea i le aoga.
O nisi foi mātua ua faanofo se tamaitiiti poo se teineitiiti e vaai isi fanau laiti ae lē avea i se aoga. Talu ona molia nisi o mātua i aiaiga o lea tulafono e lē o faaitiitia ai lava le vaaia o fanau e lē o i ni aoga.
