“Tautala pe lē Tautala” le manulauti o le finauga Vaiaso o le Gagana Samoa

E toatele sui Samoa o ofisa eseese o le malo na auai i le finauga i le Ofisa o Tagata o Atumotu i le laumua i le Aso Tofi, 29 o Me. O lenei finauga na faatinoina ona o le faamanatuina o le Vaiaso o le Gagana Samoa, ma sa tapenaina lava e le Ofisa o Tagata o Atumotu.
O le manulauti lena o loo i luga ma o se mataupu foi sa matagofie ona faasolo i ai mafaufauga ma finauga a itu e lua; le itu tetee ma le itu e lagolago.
O le susuga ia Su‘a Leituposa Thomson sa fai ma taitai o le itu tetee ae fesoasoani e Matalena Leaupepe ma Maanaima Lafoai. O le fetalaiga ia Faamatuainu A. Nonoa (NZQA Chief Advisor) sa taitaia le itu lagolago ae fesoasoani i ai Martin Mariota (MoE Advisor) ma Losa Auelua (malie ua lē maua le ofisa).
O faamasino na feagai lea ma le Afioga ia Galumalemana Afeleti Hunkin (faiaogaulu o le Gagana Samoa i le Iunivesete o Vitoria ma le Afioga ia Le‘autuli‘ilagi Taotua Malaeta Sauvao (Taitaifono Aoao o le FAGASA).
O le finauga sa faatāuaina e faamanatu ai le Vaiaso o le Gagana Samoa ma o se mafutaga fiafia foi lea a alo o Samoa mai ofisa eseese o le malo, ua maua ai lea avanoa tāua e feiloai ai.
Na ta‘ua e sui o le itu tetee o le lē tautala e sili lena e sefe ai le taimi ma e faigofie/vave ai ona faatino galuega. Afai e lē lelei le faasamoa ona ‘aua lea le tautala ne‘i ta‘u ni upu e lē talafeagai.
O le itu lagolago na latou finau e lelei le tautala i le gagana Samoa tusa pe lē lelei, ae o le mea sili le taumafai, e faifai lava iu ina lelei.
O le faaiuga na faia lea i le tomai e finauina le mataupu. O le iloa ona tetee vaega o loo taumafai le isi itu e finau mai ai, ma le iloa ona faaalia ni suesuega (mau) e lagolago ai manatu faaalia, atoa ma le saunia lelei o le gagana a le tino e faaalia ai le atoatoa ma faamaoni le talitonuga i le itu o finau agai i ai.
Na faaiuina le finauga ina ua valaauina le aofia mo le taumafataga na saunia e le Susuga i le Pule ia Pauline Winter ma le ofisa o Tagata o Atumotu.
O le Afioga ia Taefu Heker Robertson na feagai ma le faatautaia o le polokalame atoa o le Finauga ma na ia faafeiloaia foi le aofia na faatasi atu atoa ma itu e lua o le Finauga, e fai ma fofoga o le Susuga i le tamaitai pule ia Pauline Winter (CEO) ma le ofisa atoa.
Faamalo atu i le tamaitai pule ma le Ofisa o  Tagata o Atumotu i le tapenaga o lenei finauga e fai ma faatāua i le vaiaso o le gagana a Samoa.
E avea foi lenei avanoa e momoli tele atu ai le faamalo ma le faafetai tele a le FAGASA Aoao ia i latou uma na faatāuaina le Vaiaso o le Gagana Samoa e ala i polokalame eseese f.t. siva, solo, taumafataga, laei, ‘ava, musika, finauga, taaloga ma soo se faatinoga ua matagofie ai tapenaga uma o la tatou vaiaso taupoina. Ua faamautuina ai foi la outou lagolago faifai pea i lo tatou tofi mai le Atua o la tatou gagana lea. Faafetai, faafetai tele!