“Ua ave la‘u talosaga e toe suesue le faaiuga”
O se tina talavou o le afioaga i le atu Safata ua sulufai atu nei i le faalapotopotoga o le Toomaga mo e Puapuagatia mo se fesoasoani i le toe tuuina atu o lana talosaga i le Faamasinoga Maualuga, e toe suesue ai le faaiuga a le faamasinoga fesoasoani na faamaonia ai lona moliaga o le faia o ni upu masoa ma faalumaluma faasaga i se tamalii o le nuu.
Sa maua se feiloaiga ma le tina talavou (taofia le suafa) i le vaiaso na tea nei ma ia faailoa ai ona lagona lē fiafia i le faaiuga a le faamasinoga. O le tamalii sa ia ave le tagi i leoleo faasaga i le tina talavou, sa ia umia se tofiga faalemalo i upufai o le atunuu pe sa avea ma faipule o le Palemene.
O ni faamatalaga feaveai lava i totonu o le nuu e faasino i le lotoifale o le aiga o le tina talavou, ma le aiga o lea tamalii le mafuaaga o se feteenaiga na taunuu lava i le faia o se iuga a le nuu na faatea ai le tuaa poo le tamā o lea tina ma lona aiga mai le faiganuu.
O le vaeluaina o le faiganuu a lea afioaga, ua lagolago ai e le aiga o le tina talavou le isi faiganuu o loo feteenai ma le faiganuu a le tamalii na tuuina atu le mataupu i leoleo faasaga i le tina talavou ona o ni tala sa ia lafoina.
Fai mai le tina na te lei lafoina se tala palauvale ma e matuā sese lava tuua‘iga ua faia ma o le mafuaaga foi lea o lona teena o le moliaga. Peitai ina ua faamaonia e le faamasinoga fesoasoani le moliaga a leoleo na faapea ona faasala tupe ai o ia i se sala e lua selau tala.
“Ou te manao lava e faasa‘o le tuua‘iga lenei ona fai mai na ou lafoina le tala i le mea sa fai ai le taaloga volipolo, ae o molimau na avatu o tagata o le aiga o le tamalii”, o le faamatalaga lea a le tina talavou. “O le ā tonu le tala e faapea na e lafo?” o le fesili tuli tatao lea a le tusitala.
Na pei e matamuli le tina e faailoa mai ae na iu lava ina ia ta‘u mai. O le a lē faailoaina le tala na lafo, ona o le li‘oli‘o i nisi o tulaga faaletulafono, ae o le a tulitatao pea lenei mataupu seia aumai se faiuga a le faamasinoga maualuga i le talosaga apili a le tina pe a oo ina fofogaina i se taimi, ona faapea lea ona toe iai se isi vaega o lenei lipoti e faalauiloa ai.
Ua faamatala le tina i le tusitala o loo ia taulimaina se tusi na avatu e le itu tagi o loo poloaina ai lona totogi atu o se tinoitupe e lua selau afe ona o tala sa ia lafo e pei ona faamaonia e le faamasinoga fesoasoani.
O le Pelesetene o le Toomaga mo e Puapuagatia na ia faailoaina mai le toe ave o se latou talosaga i leoleo e toe sailiili lelei ai le mataupu a le tina talavou. O le saunoaga mai a le pelesetene o loo toe faia i ai suesuega a leoleo.
