Se mea lava ina a manaia o uso ae mafuta faatasi ma fealofani! Ole faamoemoe ua taunuu ole laau lava lea ole soifua auā sa taumate faalou lē magā pe taunuu le faamoemoe sa nofo tatalo ai taitai o Divine Mercies a Kuiniselani, lea ua tau lau. Ua loa ona lausilafia ele toatele aemaise lava i totonu ole Ekalesia Katoliko le Ituaiga ua ta‘ua ole Divine Mercy, ole igoa lea e ta aofai uma ai Senakolo.
E lē toe maua lenei faatasiga e oo ile faavavau, e tusa pe toe faamanatu ile la tausaga fou, ae o le Sulufaga faaiu ole 2016 e lē taitai ona faatusalia ona ole uigaese o lona faafoeina aemaise le mūmū pa‘epa‘e mai o togiga a Senakolo e 6, na vaaia ai le mamalu ole Atua ae na momoli atu ele upu faalaeiau na taitaia ele Tamā faaleagaga le afioga ia Patele Epati Tamati le taulaga siitia, ose vaega silisili lea ona tāua, ae maualuga ai le viiga ole Atua.
Ole tele o a latou galuega fai, e pei o talosaga molia, asiasi i aiga, falemai ma ē o mama‘i, o ē loto mafatia ua molimauina ele toatele, ma ose fiafiaga foi lea ia i latou e faaauau pea o latou tiute ma galuega lelei. O soo se taimi lava ole aso e fai ai talosaga peitai e faapitoa lava ile itula e 3 ile afiafi. O nisi Senakolo e fuafua lava i o latou taimi ma avanoa o a latou mafutaga tatalo. Ole Sulufaga (Feast Day) a Sagata Faustina e faamanatuina lava ile aso 5 o Oketopa i tausaga uma, peitai na autasi finagalo e faatāua ma faamamalu e ala ise Misasā lea na faia ile Aso Sa aso 9 o Oketopa.
Ua tupu ma ola le Divine Mercy i Kuiniselani ma e ono aai oloo iai Senakolo e pei o Jindalee, Inala, Woodridge, Goodna, Caboolture, ma Darra. Ose fiafiaga sili ile afioga ia Patele Epati Tamati ona oloo tino mai galuegafai e pei ona molimauina ile Divine Mercy a Kuiniselani aemaise itu e fia ole lalolagi oloo iai lenei Ituaiga.
Ole toatele ole paia o Samoa sa molimauina lenei aso faapitoa, na valaaulia uma lava ise taumafataga tele sa tapenaina e Senakolo e ono auā fai mai le isi toeaina Upolu, “Se ole malafoni faatasi ole faaleagaga male faaletino e paleni sikueli ai mea uma.”
