O le afiafi o le Aso Sa na toai taunuu mai ai i fanua o Samoa le ausiva a le SSAB Samoa Toa ina ua mae’a ai le tauvaga siva Hip Hop International e pei ona sola mai ai le ausiva a Samoa ma le ipu o le siamupini a le Pasefika. O se tasi lenei o faaeaea ua ave maualuga ai le igoa o Samoa i lenei tauvaga tele e pei ona talimalo ai Aukilani Niu Sila.
Na tumutumu aiga ma uo a lenei ausiva i le Malae Vaalele Faavaomalo a le atunuu i Faleolo ma a latou banners e tusia ai ma faafeiloai ai le toe taliu manuia mai o nei fanau. O le toatele o nei fanau na malaga i Niu Sila i le ausiva lenei, o lo latou uluai taimi lenei ua tauva ai ise tauvaga tele faapenei, ma o le lagona lava o le faafetai ma faafoi ai le viiga i le Alii ina ua iu ma le manuia a latou taumafaiga i le vaega muamua o lenei tauvaga.
Na auai ai i le Malae Vaalele le Afioga i le tamaita’i pule o le TV1, Galumalemana Faiesea Matafeo ma nisi o le pulega a le TV1 e faafeiloai ai le malaga manuia mai o le fanau, o se tasi o sui o le komiti faafoe o le pulega a le TV1, le Afioga ia Matafeo Reupena Matafeo na taitaia se sauniga puupuu i le Malae Vaalele e faafoi ai le viiga i le Alii. Na vaaia le loimata maligi o fanau aemaise foi o matua e pei ona malaga atu i le Malae Vaalele. Taua e se tasi o sui o lenei ausiva, e leai lava se isi mea e faasilia ua na’o le faafetai lava i le Alii aua sa nofo tatalo matua ma aiga aemaise o le atunuu ina ia iu ma le manuia lenei tauvaga.
O le aso gafua o le vaiaso lenei ua faamoemoe e faia ai se sauniga faapitoa i le ofisa o le TV1 e saunoa ai le tamaitai Pule e faafetaia ai le sao o nei alo talavou o Samoa ua agiagia ai le igoa pele o Samoa i laufanua o Aotearoa. Saunoa foi le taitai malaga o lenei ausiva, o se tasi o sui sinia o le pulega a le TV1, Afioga Toleafoa Asiata Pili Afamasaga, e tele lava se lu’itau na feagai ai ma le fanau ao iai i totonu o Niu Sila, aemaise i le taimi na tapena ai i le tauvaga. Saunoa Afamasaga, na faigofie mea uma ma le faamoemoe na tauva ai i Niu Sila ona o le loto e tasi ma le galulue faatasi ai o le ausiva atoa.
Na momoli foi le faafetai a Afamasaga iai latou uma na lagolagoina lenei faamoemoe. Ua mae’a le Amouta ma le Amotai. Ua taualuga foi le toe Aso nai Moamoa. Momoli lea o lapalapa o Malo i le Puna o manuia uma. O Lē o loo faavae a’i si o tatou malo. Ua sasaafaaoti le uto a le faimea, ua outou sii le Atunuu i luga ole maasalafa. Faamaualalo lea ma faapea ifo “o tatou nei o ni auaunaga le aoga”. Malo le faaeaea atunuu, aiga, nuu ma ekalesia. Momoli le faamalo i alii talavou uma lava e to’a 15 lea na o latou tauina le taua i le Hip Hop International.
1. Numia Faamatuainu Viliamu (captain)
2. Sha Husein Betham (vc)
3. Alatina a.k.a Chong Nee
4. Andrew Meki
5. Ioane a.k.a Dize Taisia
6. Kolio Francis Pai Filisonuu
7. Levaula Lotopa
8. Jr Ofisa
9. Manuele Faapale
10. Benjamin Betham
11. Johnny Edward
12. Tautulu Vicdez Lemana
13. Barry Kalapu
14. Lauese Revival Manuleleua
15. Ailua Saofaiga
Manager/Choreographer: Sulusi Faapopo
Asst. Manager/Music Composer: Kolone Tofaeono
E pei foi ona silafia a’o lei malaga atu lenei ausiva i Niu Sila na maua ai se avanoa e faamanuia ai le taitai o le atunuu le Afioga i le Alii Palemia, Tuilaepa Sailele Malielegaoi e pei ona ia apoapoa’i ai i le fanau, ia tautuana ma latou le igoa pele o Samoa ma faaoga lelei le avanoa ua maua. O loo iai foi le faamoemoe e toe savalia ai le ofisa o le Afioga i le Alii Palemia e momoli ai le faafetai e tusa ai ma faamanuiaga mo le fanau.
O le masina o Aokuso o le tausaga lenei ua faamoemoe e faataunuuina ai le tauvaga tele a le lalolagi i totonu o Arizona Amerika lea o le a malaga ai le ausiva lenei a le SSAB Samoa Toa.
