O le tausaga ua mavae e toetoe lava maua le valu sefulu o alii seila na maua galuega i luga o meli ma vaa lau oloa i fafo, peitai o le alii seila na faia le saunoaga faafetai i le Malo ma matua ao lei malaga mo ia galuega, na muamua lava tietie i le vaalele ma toe foi filemu i Samoa ina ua faaletonu i le tagofia o le avamalosi.
O seila o le a tuua se taimi o le masina nei ma le masina fou o Me o le tala foi lea ua ave iai, ia tautuana le avamalosi o le fili numela tasi lea oi latou e maua galuega i fafo.
O le 59 o seila ua faamanuiaina i ia galuega o oo fefiloi seila fou faatoa avanoa ma seila ua maua le faalua ma le faatolu o galulue i luga o vaa tetele i fafo. O le saunoaga a le Minisita o Galuega tetele a le Malo e aofia ai ma le Kamupani vaa a Samoa le susuga Papalii Niko Lee Hang, ina ua faia le faamavaega ma lea vaega o alii seila, e faaapea o faamaumauga o tupe maua a le Malo e 12 miliona tala o loo tafe mai i le tamaoaiga o le atunuu ona o galuega a alii seila i fafo , e aofia ai ma seila o loo galulue i luga o vaa fagota tetele.
O le sailia o avanoa faigaluega mo seila o le isi lea galuega tauave a le kamupani vaa o Samoa le Samoa Shipping Services o loo gafa ma le faia o feuiuiaiga ma kamupani vaa i fafo mo le fia maua oni galuega mo alii seila.
E fa selau alii seila Samoa o loo galulue i fafo ile taimi nei e le faitauina ai alii seila o le a malaga ile masina nei ma le masina fou o Me.
O le molimau a se tasi o alii seila le susuga Ierome Mose ina ua lauga faafetai i le Malo ma le tapuaiga a matua, e le faigofie galuega i luga o meli ma vaa lau oloa. Tasi lea alii seila ua faalua nei ona maua lona avanoa e galue ai i luga o vaa i fafo. Na ia tautino e le tatau ona manumalo iai latou nisi uiga le lelei ma ua amio e tauvalea ai le Malo ma aiga aua ia faalagolago i le Atua i taimi uma. Ua toatele aiga o le atunuu ua manuia i galuega a alii seila e le gata o le fausia o nai pisinisi laiti ae o isi meatotino ua maua e pei o taavale ma fale ona o le lelei o seleni e maua e fanau o loo galulue oni seila.
O le Aso Faraile o le vaiaso nei e feiloai ai sui o le kamupani vaa a Samoa ma matua o seila e toa 59 e faamalamalama iai aiaiga o galuega ma seleni o le a maua eo latou alo ma fanau.
