Ua ripotia nei i Sini le taunuu mai o se tamaitai Ausetalia na tafao i Bora Bora i Tahiti ma le siama o le faama‘i feaveai e namu le Chikunkuya. E ui e lē o le igoa lenei o le faama‘i ua faailoa i Sini nei ae o auga e tutusa lava ma le Chikunkuya.
I totonu lava o le falema‘i tele i Liverpool na faamauina e to‘a 40 i latou i le tausaga talu ai 2014 na taofia ma togafitia lea ua manuia mai faama‘i pepesi mai namu. I le tausaga 2013 e tusa ma le fitusefulu (70) na togafitia ma toe foi i aiga mai lenei siama ua maliliu ai nisi i le Pasefika ma Samoa.
O le toatele o i latou i Liverpool na gasegase mai le afaina i namu e nonofo latalata i le vaitafe tele i Liverpool o le Georges River lea e iai vaega e to‘a ai le vaitafe latalata i maota ma laoa.
E pei ona silafia o nofoaga nei e fiafia namu e tuufua ma faatuputupulaia ai ma pepesi atu ai le siama lenei ua faaigoaina o le ‘Ross River Virus’.
O tausaga ua tuanai na iai faama‘i pepesi sa feaveai e namu ma mafua ai le fiva samasama ma nisi e pei o le tupa ae o le tulai mai o le Chikunkuya ua maliliu ai lava nisi.
I Ausetalia nei i totonu o le falema‘i i Liverpool na taofia ai tagata afaina e leai se tasi na maliu e faatusa atu i Samoa lea e molimau o le tagata e maua i lea ma‘i e lagona le tino vaivai, patapata le tino ma fulafula sooga o le tino.
E iai nisi ua molimau o le fualaau o le Panadol le fofo o lea faama‘i ma ua tatau na utagia foi e nisi e malaga atu i Samoa.
O loo lapataia foi tagata tafafao i le atu Asia ma le Pasefika e aofia ai Samoa ia tauave fagu e uu ai tino mai le osofaia e namu aemaise isi fagufaasausau e sesegi ai namu. E lē gata i lea o le faia o tuipuipui mo i latou e lei faia muamua mai tausaga ua tea.
