E lē talitonu le toatele e talatalanoa pea, i le tulaga maoae na mae‘a ai ona fausia le fale piliki e 6 potu moe o le Susuga ia Simona ma le faletua ia Losivale i Palisi.
O se ulugalii talavou, na avea lava le kekepuaa o se pisinisi e fiafia lenei ulugalii e kuka ma faasavali i vaega taulalata atu o le taulaga, faapea foi i totonu lava o Palisi.
Ua lauiloa si alii o Simona i si ana atigi pusa e amo i taeao uma, e selau kekepuaa i le osofaiga e tasi, a maua pea lona malosi i nisi aso ua au lava i le faafā ona laa teleai ane ma le atigipusa kekepuaa e topetope lava ona vae e faatali le mānava o galuega. Na sāua lava i le faalogo a le sui o le Savali, toetoe o tagata Palisi e talatalanoa ma taliē pea i le tagata lenei e igoa ia Simona. O lea na saili ai le avanoa e talanoa ma Simona, ma ia faamatala ai faapea, “E sese tala ‘ole ua ou faalogo i ai, a o le Samaria agalelei lea na faasino mai e le Atua e afe i ai i lona ofisa.
O le tagata la te lē masani, e laitiiti poo se 20 tausaga, a o le mausa o le tagata o le kekepuaa. E ono (6) kekepuaa a le tagata lenei e faatau i lo ma faleaiga i aso uma.
O aso uma ou te alu e tauaao lana taumafataga, e matuā faaalia lo‘u agaga fiafia ma le faaaloalo e tauaao ai si ana 6 kekepuaa. Ua faasolo ina mafana si a ma mafutaga ma le alii Ofisa o le pisinisi laupapa sima apa ma soo se vaega faufale, sa faapea loa ona talatalanoa mai ia te au e uiga i lo ma aiga.
Na ou faailoa manino lava i ai, o lo‘u aiga o se aiga limavaivai ma le mativa, o le kekepuaa lava lea e faaaooga ai le fanau teine ma faatau ai a matou meaai i aso uma. O faalavelave fai o le kekepuaa lava lea e la te faafeagai.
Na iu ina fesili mai ai le alii Ofisa ia te au, pe fia se seleni e mafai ona ou totogia i le masina pe afai na te faia uma se oka mo so matou fale ma si a‘u fanau. Sa ou ofa i ai le selau tala i le vaiaso, fai mai ua tele lea ae toe mafaufau i se isi tau, pei e lelei le $50,00 i le vaiaso, o iina la na amata ai loa ona faatau la‘u kekepuaa ua amata foi ona ou togitogi le $50 i le vaiaso, ma peiseai ua oo mai foi le tiapolo ma faapea mai, ua faavalea a‘u e le tamaloa e poto ma atamai.
Peitai o le aso na sosoo ai, ou te fotua‘i atu ma la‘u atigipusa kekepuaa i totonu o le Ofisa ae tuu valaau mai tama o le Ofisa o tutu mai luga o le loli, pe o gafea o Palisi e momoli i ai la‘u uta. O se tala mālie le taunuu atu o le uta, auā sa ou lē talanoa lava i se isi o lo matou aiga, e na o a‘u lava o lo‘u toalua ma si olomatua le tina o lo‘u toalua. E taliē lava alii o le kamupani na o e ave le uta ma faamatala.
Na taunuu le loli i Palisi faasino ane e tamaiti lo‘u fale, ona alu atu lea o le loli ua tu i luma o le fale ma tuu valaau i lo‘u toalua. Na vaaia le faateia o le fafine ma faapea mai. E leai faamolemole, o ai e ana lena uta? Na faapea atu, o le uta a Simona, faasino loa e si fafine i le i si toeaina e igoa ia Simona e fai si maomao atu. Na toe vaaia le solomuli mai o le loli, ona valaau ane lea.
O le fale lea o Simona e fai lana kekepuaa? Ia o lea faamolemole. O le uta lea a Simona, o le fale uma lava lea ua aumai. Ua na o lima o le fafine ua tuu a‘e i luga ma sapai ai lona fatafata ua leai lava se tautala ua vaaia foi ua faasolo ina popole.
Ona faato‘ato‘a atu lea aua le popole o le fesoasoani a lo matou pule e ‘ai lava ana kekepuaa ia Simona i aso uma, o lea e togitogi tai $50 tala i le vaiaso. Ua tu nei le failā, ua uma foi ona maamora o se isi lea maota taugata i totonu o Palisi.
