O le suafa o Filipou Pinati Williams e fou i Sini nei ae peitai o se suafa ua logologoa i le musika ma faaili i totonu o Samoa ma Niu Sila aemaise foi i lona siufofoga mālie i luga o le 2AP ma le Talofa FM.
O lenei siufofoga mālie e lē faagaloina e le mamalu o le atunuu sa mulimuli ma fiafia i faaili sa taulamua ai e pei o le Williams Bay Band i Fugalei.
Na sosoo ai ma le Mt Vaea i Lalovaea mai le 1991 i le vaitau tonu na mae‘a ai le afa o Valelia. Sa faapei o le matautia o le afā le taatele ma le logologoā o fatuga ma pese a le faaili iloga lenei a le Mt Vaea i lea vaitau.
O nisi o Pese iloga a Filipou Pinati Williams e aofia ai le pese o le ‘Suafa‘i’ aemaise le ‘Loto ua Pologa’.
O nisi o suafa faifaaili na latou ta faatasi i le Mt Vaea e aofia ai Jason Joseph, Mitai Leniu, Toelau ‘Joker’ Alailima, Poleki, Ollie Brown ma Faamanatu Solomona.
O le tausaga e 1997 na siitia ai i Niu Sila Filipou Pinati Williams ma auai ai i le faaili na faaigoaina o le ‘Pacific Wave’.
O nisi na iai i lea faaili e aofia ai Alfred Wendt ma Alu Tila Kalolo (Te Vaka) ma Melenau Lino le tamaitai Toga lea ua pese nei i le Fiafia Band ma o loo pepese foi ma Tui Eddie Taualapini ma Joe Failua i nisi o a la CD.
O le 1998 na amata laasia ai loa e Filipou Pinati Williams le vaega o tagata fai faaili taitoatasi (One Man Band) auā ua fai aiga nisi o le faaili ae na ia faailoa ua totoe ai na o meafaaili. O lona agavaa i le taina o soo se meafaaili na faigofie ai lea laasaga fita.
O le tele o tausaga o faafiafia ma pese i soo se faatasiga lenei tamalii ua atoatoa uma ai le ituaiga pese ma fati e o tutusa ma faamoemoe e sasao ai lenei ‘Faaili Toatasi’.
O soo se ituaiga musika mai pese Samoa, Reggae, R&B aemaise pese atunuu e maua uma i faafiafiaga a Williams.
O le Aso Toonai 3 o Oketopa 2015 o le a faalogo ai loa Sini i le Siva Tele o le a faia i Punchbowl i le matautia o lenei taleni ua fuafua mo le Kalapu Havana. Mo faamoemoe e pei o Tusigaigoa ma Siva e maua se avanoa mo lenei Faaili maoae pe a faafesootai le 0406117912.
