E ese foi vaaiga na molimauina i le malaevaalele i Faleolo i le faaiuga o le vaiaso na tea nei ina ua taunuu se vaalele mai i Ausetalia ma se uta o manu papalagi, povi faapea ai mamoe ua aumai mo le faamatuu atu i le aufai lafumanu o le atunuu.
O le lafumanu lea na faapea ona asia e ni sui o le Pulega a le Matagaluega o Faatoaga ma Faigafaiva na malaga i Ausetalia e faamautu ma o le mae‘a lava o le filifilia o nei manu papalagi na faagasolo ai loa le galuega ina ia mautinoa e vave ona aumai i Samoa.
O mamoe muamua nei ua mafai ona aumai i le atunuu e ese mai i mamoe ua aumai i Fiti – ae o lea faatoa agai i Ausetalia mo lea foi manu papalagi auā o le tele o mamoe mai i Fiti ua faapea ona faatau atu i le aufaifaatoaga lafumanu i totonu o le atunuu.
E lima itula na agai mai ai le vaalele na aumai faapitoa ai lea uta ma na ta‘ua e le alii pule o le Matagaluega o Faatoaga na fua lava e tatau ona agai mai le uta lenei ma e taunuu mai lava e lē o iai se faaletonu i manu papalagi.
O le tele lava o uta o meaola mai i Samoa nei e aumai i le vaa a lalo peitai o le faamatalaga a le Matagaluega ua lē aumaia i se vaa a lalo ona o le laitiiti o le uta fuafua i isi uta sa masani ona aumai i le atunuu i tausaga ua mavae ma o le mafuaaga lea na manatu ai e laitiiti atu le tupe e aumai ai i le vaalele ia meaola nai i lo le faigamalaga umi lea o le a sau i le sami ae e lē o tele ni manu papalagi. 
E 29 mamoe.
