Ua agai pea i luma le tomai ma le silafia o tagata Samoa i le tusia o ni tala ma fausia ai ata tifaga. O mea lava o loo tutupu i totonu o le siosiomaga o le atunuu o Samoa, o iina o loo mafua mai ai le ‘oa o manatu ma lagona o tagata o le atunuu i le faatinoina o ata tifaga. E lē gata i lea ua aliali ai foi ma le taleni o loo taotaomia i tagata o si o tatou atunuu i le faatinoina o vaega taitasi o le ata.
Ua manino mai nei foi la le vaega muamua o le ata tifaga fou lenei o le ‘Tofia e le Atua Samoa e Pulea e Matai’, lea ua taunuu i laufanua o Aotearoa i le faaiuga o le vaiaso ua mavae.
O lenei ata sa tusia ma fatuina e se tasi o tamalii o le atunuu le susuga ia Sola Ati Nepa. E 9 masina na tusitusia ai e lenei tamā le tala ma faatinoina ai loa se ata tifaga e pei ona iai lona vaega muamua.
E 14 le aofaiga o i latou o loo auai i totonu o lenei ata, e aofia ai nisi o tamalii mai le afioaga o Vaimoso ma Mulifanua. Ae na ta‘ua e le susuga ia Sola Ati Nepa, o le mafuaga na ia taumafai ai i lenei ata tifaga ona o mea o loo tutupu i totonu o aiga Samoa, ua ia lagona ai e iai se feau tāua o loo momoli mai e lenei ata mo aiga.
E 3 masina na pue ai le ata ma tuufaatasia e le kamupani o le BTS i Vaimoso, e le susuga ia Fetalaiga Fetalaiga, o se kamupani ua leva foi ona tautua ia Samoa i le pueina o pese ma ata.
O le faaiuga o le vaiaso i le Aso Toonai, aso 14 o Mati o le a tatala ai loa lea ata i le fale faafiafia o le Club Orator i Papatoetoe, ae o le mae‘a ai o lenei faafiafiaga o le a manino ai loa ma nofoaga o le a faatauina ai le ata, ma le faamoemoe o le a malaga i Ueligitone i le vaiaso fou.
O le fuafuaga o loo faataoto e lenei tamalii o le atunuu ia Sola Ati Nepa, o se seleni o le a maua i lenei ata o le a fesoasoani ai i Samoa i le Victim Support ma le Mapuifagalele ma nisi o vaega o le atunuu o loo fia maua ai le fesoasoani i mea tau tupe. O Sola Ati Nepa e mai le afioaga o Leauvaa i Apia.
