O le malumalu o le Ekalesia Faapotopotoga Samoa i Niu Sila i Henderson, na faapaia ai i le Sakalameta o le faaipoipoga le alii o Henry Luapene Nepo ma lana manamea ia Levei Toleafoa, i le Aso Toonai ua mavae, aso 7 o Mati sa faataunuuina ai lea sauniga paia.
O aiga na lua, o uo ma ē masani sa faatasi atu e molimau lenei mafutaga ua tuufaatasia ai i laua, e leai se tasi e mafai ona faateteaeseina seia vagana le oti.
Sa faapea foi ona auai atu i ai ma le afioga i le Konesula o Samoa ia Faolotoi Reupena Pogi. O se aso lagilelei ma le susulu manaia o le la i le alofa o le Atua.
O le susuga i le faafeagaiga ia Rev Faamalua Peteru na ia taitaiina le sauniga, a o tuaa o le tamaitai ia Levei le tamā ia Semua Fatu Toleafoa na ia foaiina lona afafine e fai ma tane faaipoipo a le alii o Henry. Na mae‘a le sauniga ona sosoo lea ma le sainiina o pepa.
O le taumafataga na faia lea i le hall a le Ekalesia Faapotopotoga Samoa i Niu Sila i Henderson lava. O le manaia ma le manogi o kuka sasala a aiga na lua na tapenaina mo le fofoga taumafa a le auvalaaulia, na avea ma ufi e tutupu i le au faafiafia mai Lepa ma Falelatai i le taimi o a latou faafiafiaga, na matuā maualuga ai le aso o le fanau.
O le Fofoga o le aso o le tofa ia Semua Momoe, ae o faaaloaloga na saunoa ai loa le tofa ia Semua Fatu Toleafoa e fai ma sui o aiga na lua e momoli se meaalofa faatauvaa mo le taitai o le sauniga aemaise ai o se upu faafetai mo le atunuu e faafetaia ai foi lo latou susū atu ma molimau le aso o le fanau.
O upu mulimuli na tulai ai le tofa ia Nanai Keli e tali faitau i le saunoaga o le tootoo o le aso ma tatala ai loa le fili alii.
O Henry, o ona tuaa o Misa Luafutu Nepo ma Liuoli Nepo mai le afioaga o Falelatai, ae o le tamaitai ia Levei o ona mātua o Semua Fatu Toleafoa ma Tuumatamaga Toleafoa mai le afioaga o Lepa i Aleipata.
