Toeitiiti lava 40 le aofia o le aumalaga mai Samoa a le Kalapu Lakapi a le Apia Maroons mai Apia lea ua tuvae nei i Aukilani ma o loo faamautu i le Kalapu Lakapi a Weymouth i Aukilani i Saute.
O le aumalaga e aofia ai tama taalo e to‘a 30 ma ofisa e toalima ma e tolu vaiaso o loo tafafao mai ai i Niu Sila nei ina ua mae‘a taamilosaga lakapi i Samoa sa tausinio ai.
O le taitai malaga o le faiaoga foi lea o le au o Auimatagi Sapani Pomare, o le Pule o le ‘au o Paul Smith, faiaoga lagolago o Fiva Aleaga ma le faufautua (technical advisor) o PJ Slade.
Ta‘ua e Auimatagi e lei faigofie le faamoemoe o le kalapu i le fia faaoo mai o lenei faigamalaga i Niu Sila nei, e pei lava foi ona iai i le tele o faamoemoega faapenei i afioaga ma kalapu ona o le taugata foi o lona faatupeina.
Peitai o le faamoemoe lava i le Atua faatasi ma le tutu faatasi o le aumalaga i sailiga seleni sa faatino i Samoa, faatasi ai ma le lagolagosua mai nisi na mafai ai ona faataunuuina ma le manuia le faamoemoe o le kalapu.
O le vaiaso nei ua iai le fuafuaga e fai ai le taaloga ma le au a Counties Manukau i le malae taalo o Laurie Gibbons i Weymouth lava ma faataunuu ai le latou faafiafiaga i le Apia Way i le po o le Aso Toonai nei.
O loo iai foi le faamoemoe o le aumalaga mo la latou Po Siva e faataunuu i le aso 20 o Oketopa, o le Aso Toonai lea o le vaiaso fou i le Clendon Community Hall i le 10 i le taeao o lea aso, o se avanoa o le a feiloai ai ma aiga aemaise o le afioaga i Niu Sila nei faapea foi uo ma e masani ua loa tausaga e lei toe fevaaiai ona o le eseese o nofoaga ua aumau ai.
O le aso 22 o le masina nei e toe foi ai le malaga i Samoa ae na faailoa e le taitai malaga le lagona o le agaga faagaeetia talu ona taunuu mai i fanua i Aukilani nei, ona o le agalelei ma le fainuu lelei foi o le mamalu o le afioaga e alala i Aukilani ma isi vaipanoa o Niu Sila mo le lagolagoina o lo latou falamoemoe.
Momoli foi le faamalo a le aumalaga i le peresetene ma le komiti a le Kalapu a le Apia Maroon i Aukilani mo le lagolagoina malosi o polokalame o le malaga faapea foi i le Kalapu Lakapi a Papatoetoe ma Weymouth.
O le toatele o tama taalo na faailoa le fiafia i lenei faigamalaga ma ta‘ua ai o se avanoa tāua foi ua fesootai ai ma nisi uso taaalo Samoa o loo taaalo i kalapu i Niu Sila nei ma fesoasoani i le atinaeina o le taaloga i komiuniti Samoa i Niu Sila nei.
Sa faafetaia foi e le peresetene le Asosi a le Aukilani Samoa ona o le avanoa sa faatino ai nisi o sailiga seleni mo le au a o faataunuu ai taaloga o le taamilosaga o loo faagasolo i le taimi nei i Magele.
