O le susuga ia Aiolupotea Polu Paletaoga mai le afioaga o Falelima i le motu tele i Salafai, o ia lea sa ia tusia le tala ma tuufaatasia le ata o le Tagi a le Faipopo, lea sa iloga foi ona faafiafiaina ai le maimoa ma le silasila a le atunuu o loo alala ma papaaao i atunuu i fafo, ua lē gata i Niu Sila nei ae o isi foi atunuu e pei o Ausetalia ma Amerika.
Sa faatalitali le toatele poo afea o le a toe sosoo mai ai le vaega lona fā o lenei ata tifaga, ae peitai ua faateia le atunuu i le osofai malosi mai o le Tama Fai i lona vaega muamua ma manino ai o lea foi alo o le atunuu o loo ia faatautaia mai lenei ata fou auā lava le maimoa a le atunuu.
O le vaiaso ua mavae na taunuu ai i nisi o faleoloa i Niu Sila lenei ata fou, ma o se mea moni lava sa tupu i Samoa i se alii sa aveesea mai i ona mātua moni. O se alii talavou ua faaigoaina ia Tili o ia sa faatea mai e le uso o lona tina ma lona toalua ina ua maliliu uma ona mātua moni.
O le mea ua tupu e lei faailoaina e ona mātua ua nofo ai nei le tupuaga o lenei alii poo le mea ua oo i ai ona mātua na soifua mai ai.
O le vaavaai mamao o Tili i lona lumanai ma ia saili galuega ai i se pitonuu o Salaia ma o iina na tupu mai ai lenei faafitauli ma mafua ai le igoa ua faaigoa ai lenei ata tifaga o le Tama Fai. O lenei ata e valu masina sa tapenaina ai, ma sa tuufaatasia e le kamupani o le TL Film, (Lolani Pito) o se tasi foi o auaunaga ua iloga lona sao i Samoa i le pueina ma le tuufaatasia o ata tifaga.
O le tele o vaega o lenei ata o loo pueina mai lava i Savaii, faatasi ai ma nisi o vaega o Upolu. O i latou o loo faatinoina le ata o alo ma tamafanau o loo i le ata o le Tagi a le Faipopo o loo latou faatinoina foi le ata lenei o le Tama Fai.
O le susuga ia Tekoli Masoe o loo alala i Levin i Ueligitone o loo taunuu mai ai le ata i Niu Sila nei ma ia tuuina atu i faleoloa e pei ona faatauina ai. O Tekoli na ia maketiina foi le ata o le Tagi a le Faipopo tolu i totonu lava o Niu Sila nei.
