O le saunoaga a le alii Palemia, ua toatele Ofisa Sili a le Malo, e fiu tagata e saili mo se fesoasoani ae e leai lava se isi e maua, a lē o lea e fiu tagata e faatali ae o loo tapunipuni ofisa ae ua lē avanoa mo tagata.
“E agai atu tagata i aso uma i lo‘u ofisa ona o le lē fiafia i uiga nei, o le sue atu e lē avanoa, a lē o le lē iai i le ofisa, o loo malaga i fono ae ua lē faia le tiute o le tali atu i fesili ma atugaluga o le atunuu,” o le faamatalaga lea a le alii Palemia i se fono ma tusitala atoa ai le tatalaga o fuafuaga alualu mamao a le Komisi o Tagata Faigaluega lea ua faatautaia ina ia saga faaleleia ai galuega ma tiute a i latou o loo galulue i matagaluega atoa ai faalapotopotoga a le Malo.
O le tasi lenei o mataupu na matuā laga e le Palemia i le tatalaga o le fuafuaga faataatia a le PSC mo le isi lima tausaga. O le tele o le fautuaga ua tuu mai ina ia maualuga le siitia o tausaga i auaunaga uma a le Malo ae ua foliga mai ua see i tua le fesootaiga lea ma le atunuu.
E lē gata i Ofisa Sili a le Malo ae faapea foi i tagata lautele o ofisa taitasi, ua ta‘ua e le alii Palemia le tele o faitioga ua oo atu ona o le leaga lava ona faatino le tiute o loo manao i ai tagata lautele.
Ta‘ua e le Komesina o Tagata faigaluega, le tofa Tuuu Ieti Taule‘alo, o le tali atu lava i manaoga o le atunuu le tulaga faigata i auaunaga a ofisa o le Malo ma ua solo i tua le customer service. O le taumafaiga la lea ua agai i ai ua fuafua lelei le maualuga o le auaunaga e tatau ona avatu i tagata o loo ua tapa tautua eseese e pei ona ave foi i ai ma le faaseā a le alii Palemia.
O le tele o mau ua oo atu i le PSC e faigofie ai ona saili le alii Palemia nai lo Ofisa Sili o le Malo ma o le mafuaaga lea o le tumutumu atu o tagata i le ofisa o le Palemia ona o loo maua lava le avanoa ae o Ofisa Sili e fiu e saili.
“Ma soia le fono soo,” o le isi fautuaga lea a le alii Palemia. E fono mai lava le Aso Gafua i le Aso Faraile, uma agai i fafo mo isi fono – o faitioga uma ia ua oo i le Palemia.
Ta‘ua e le Komesina o Tagata Faigaluega, o le a tagai le Komisi i auaunaga uma ma ia taumafai e mulimulitai i fuafuaga nei ua faataatitia auā le faaleleia atili o le auaunaga a ofisa uma o le Malo.
