Na afea i le faaiuga o le vaiaso i Sini Ausetalia i le malaga a lana afioga i le Ao Mamalu o le Malo Tui Atua Tupua Tamasese Efi ma lana Masiofo, Afioga Filifilia Tamasese lea na taliu mai i sa la malaga asiasi i Europa na feiloai ai ma le Tamā Paia ia Pope Faranisisi i le Vatikana.
Na vaaia le soifua laulelei o lana Afioga ma lana Masiofo i se ‘ava o le feiloaiga na faatinoina i le Hall a le Ekalesia Katoliko i Panania. Na auai le mamalu o le aufaigaluega a le Atua mai Ekalesia eseese ma o latou faletua faapea taitai o le atunuu i Sini aemaise le maave eseese o Samoa na auai atu. O se sauniga puupuu ma se feiloaiga ma le mamalu lautele na fai lea ma avanoa e feiloai ai aiga ma uo i le taitai o lo tatou Malo ma le Masiofo ua loa lona sao i upufai a Samoa.
A o faagasolo se taumafataga na mae‘a ma gasolo atu ai sui e feiloai atu ma tapue o latou ata ma le faigamalaga mamalu e fia avea ma ni pine faamanatu o le feiloai atu i lana Afioga ma le Masiofo.
E pei ona silafia o le afioga i le Tui Atua ua silia ma le tolusefulu tausaga o tautua mo le Malo o Samoa ma sa avea foi ma Palemia faapea le Itu Agai. O se taitai iloga i le Tofa mamao ma le manino lea lava na feiloai atu ai i le Pope Faranisisi a o iai le la savali i Europa.
O nisi o mataupu na faasoa ai lana Afioga ma le Tamā Paia o le soifuaga i aso uma i Samoa faapea le tulaga o iai le faasoa a aiga taitasi. E lē gata i lea o le tāua ma le sao o le talitonuga Katoliko i le soifuaga o aiga i Samoa aemaise lava i le faatāuaina o le soifua atinae o tagata lautele.
Sa fefaasoaa‘i foi i laua i le agaga galulue faatasi o atumotu o le Pasefika aemaise lava i itu e puipuia ai lo latou siosiomaga mo fanau i le lumanai. Na mae‘a feiloai atu ai loa le Afioga i le Ao Mamalu ma le Masiofo i sui o le Vatikana e pei o le failautusi ia Katinale Pietro Parolin.
Sa faapea foi na feiloai atu i le Failautusi o Setete ia Katinale Dominique Mamberti a o lei toe taliu mai mo Samoa ma afea ai Sini mo nai aso. O le taeao o le Aso Sa na toe taliu ai le lato i le ea ma le lato i le tai a le Afioga i le Ao o le malo ma lana Masiofo mo Samoa.