Faapogai
E oo mai i le taimi na tusia ai lenei lipoti e le o mautu lava finagalo o le toatele i le mataupu e pei ona vevela ai felafolafoaiga ma finagalo faaalia i luga o upega o fesootaiga, televise, leitio faapea nusipepa i le atunuu e faatatau i taumafaiga a se vaega o tagata Maoli o loo ua agai i ai le toatele o tagata Pasefika mo se fesoasoani mo visa e aumau ai i le atunuu nei. O le alii Maoli e suafa ia Gerrard Otimi sa ia ofoina lana fesoasoani e mafai ai e tagata ua ova aso i Niu Sila ona nonofo i le atunuu mo le sefulu o tausaga. O le mau a Otimi e faapea ua fai si umi ona ia faia lenei galuega amata mai i le tausaga e 1968 talu ona faamatuu atu ia te ia e ona Kaumatua poo e matutua i lea ituaiga. I se feiloaiga sa faia i Manurewa i le vaiaso na tea nei na fesiligia ai Otimi i lana galuega o loo faia nei peitai na ia faaalia o ia e fia fesoasoani mo e manaomia le fesoasoani aemaise o nai aiga vaivai, ma e le o se faiga taufaasese o loo ia faia. O le gaioiga lenei a Otimi o loo faatonuina ai tagata ua ova aso i le atunuu e totogi atu le tinoitupe e lima selau tala Niu Sila e avea ai ma tagata moni o lana ituaiga poo le hapu ma e maua ane le pepa faamaonia e tali foliga i se tusifolau, ua faia se kopi e faamaonia ai lea tulaga. E lei mafai ona faamatuu ane e Otimi lenei pepa faamaonia i le au tusitala i lea aso.
Suesuega
O le tulai mai o lenei ituaiga mataupu ua vave ai foi ona faia suesuega a le toatele pe moni pe leai foi lenei fuafuaga. O nisi ua o latou faaalia e taufaasese ma e le moni nei galuega ma ua faaaoga e Otimi tagata Pasefika e saili ai ana tupe. Peitai i se faatalanoaga foi ma le afafine o lea tamā, le tamaitai o Joanne sa ia faaalia ai o lona tama o se tagata agalelei i tagata ma o lana lava lea amio o le fia fesoasoani i tagata mafatia. Sa faailoa e lea tamaitai o loo teuina uma e lona tama lisiti o faamaumauga o tupe na totogi e tagata sa faagaioi o latou pepa i lalo o lenei fuafuaga. O le faamatalaga a Otimi na faia i lea aso e na te talia fiafia ni suesuega a leoleo e faia i lana galuega o loo faia aua a leai ni suesuega, e le mafai foi ona malamalama le atunuu i le galuega o loo ia faia nei. O le tulai mai o lea mataupu sa afea ai foi ma faamaumauga i le aofai o tagata o loo ova aso i le atunuu e pei ona agai tonu i ai taumafaiga a lea alii Maoli ma se vaega o tagata o loo lagolagoina o ia. O le taimi nei ua faamaonia e lata i le 16 afe le aofai o tagata ua ova aso i Niu Sila ma o le fa sefulu pasene o ia tagata e mai le Pasefika.
Pe moni?
O le ofisa lava e feagai tonu ma mataupu faapenei sa agai i ai suesuega a le Samoa Times ina ua faalogoina lenei mataupu. O le tali mai le Matagaluega o Leipa e tauala mai le ofisa o femalagaaiga a le atunuu, e sese le auala o loo faatino nei e Otimi ma lana vaega. O i latou uma e fia maua ni visa poo mataupu foi tau nofomau i le atunuu nei e ao ona agai sao i le ofisa o femalagaaiga ma e le faaaogaina se pemita poo se visa e lei aumaia sao mai le ofisa o femalagaaiga. O le pepa o faamatalaga na tuuina mai o loo tusia ai le faamatalaga a le faauluuluga o lea ofisa o Andrew Annakin na ia faaalia ai e faapea ona o lea fuafuaga e le o aafia ai talosaga sa tuuina atu i le ofisa o femalagaaiga, o le mafuaaga lea e le o mafai ai ona molia ona e lei solia se tulafono o femalagaaiga (Immigration Act) ae ono solia se tulafono o soligatulafono (Crimes Act) ma o le mafuaaga lea ua tuuina atu ai nei faamaumauga uma i leoleo. Fesiligia foi le ofisa o leoleo i lenei mataupu mo sa latou foi faamatalaga, peitai i se pepa o faamatalaga na tuuina mai i le Samoa Times i le ogatotonu o le vaiaso na tea nei na faaalia ai, e le o iai se solitulafono a le fuafuaga lea i le taimi nei e ui o loo faaauau pea suesuega.
O loo fautuaina mai e leoleo le mamalu o le atunuu ua mafai ona totogiina ni tupe ma faia ai foi ni pepa i lalo o lenei fuafuaga ina ia faafesootai atu le ofisa o leoleo i se taimi vave. Sa maua foi le avanoa o le tamaitai tusitala a le Samoa Times, Maria Faasino e faatalanoa ai Otimi ma nisi o lana au lagolago e uiga i lenei faamoemoe. Na fesiligia e Maria Otimi pe ua iloa e le ofisa o femalagaaiga ana gaioiga ia e faia, ae na tali Otimi ua leva ona silafia lea tulaga. Toe fesili foi le Samoa Times pe le aafia ai i le tulafono i lenei gaioiga, ae o le tali a Otimi o le taimi nei e leai se malosiaga o le matagaluega e taofia ai o ia ona e le o se solitulafono lana mea o loo faia. Toe fesiligia foi pe toafia ni tagata ua maea ona totogi ni tupe ae tali Otimi ua 50 tusifolau, o lona uiga ua toa lima sefulu ni tagata ua oo atu mo talosaga. Sa maua foi le avanoa e faatalanoa ai nisi o tamalii o le atunuu na faaalia sa maua le fesoasoani tele mai ia Otimi e pei o le susuga i le faifeau ia Penani aemaise o le susuga Afakasi Slade lea sa muai faamanuiaina ai foi i lenei taumafaiga. Faaalia e Otimi e leai se malosi faaletulafono o le Immigration e aveesea ai Afakasi ma lona aiga mai Niu Sila nei ona ua faamauina o se tasi poo ni sui o le auaiga Maoli o Otimi.
Mose pe Taufaasese?
O le tulai mai o lenei mataupu ua manatu ai nisi atonu e le o mautu lava se tali i le taimi nei pe moni lenei gaioiga pe leai. E manatu nisi o tagata Samoa ma le Pasefika nei o loo latou lagolagoina Otimi, o ia moni lea o Mose peitai ua manatu foi nisi o Otimi o le matua taufaasese lava ma pepelo. Ui i lea o nai manatu faaiu sa fili mai e le Samoa Times mai nei mau faatalanoaga na taua ai e se tasi o tama, e lelei pe afai e moni o Otimi o Mose ae leaga le fai fai ae tei ua pepelo mulimuli ane. O se finagalo faaalia o se tasi tina na ia faaalia ai, e aoga foi le tulai mai o lenei mataupu e toe tomanatu ai ma avea ma fafagu i taitai o le komiuniti a le Pasefika faapea foi Samoa, ina ia tagatagai i nisi o itu e mafai ai ona finauina ai se fesoasoani mo nai tagata ua ova aso i le atunuu, pe le mafai ona toe faamatuu tasi mai e le malo se fesoasoani mo latou ia ae pe toe faafoi loa foi i atunuu moni na soifua mai ai. O le a tulituliloa pea e le Samoa Times lenei mataupu mo se faaopoopoga i le vaiaso fou.
