O le tausaga fou o le a faia ai se suiga lea o le a tapa ai kamupani vaalele uma o loo tautuaina faiga malaga i totonu o le atunuu, ina ia saunia lelei a latou faamaumauga aloaia o taimi o faigamalaga a latou vaalele.
I totonu o Ausetalia ma Amerika, e matua faamamafa le tausisi uma o kamupani vaalele i taimi ua faatulaga e malaga ai o latou vaa, peitai e le o faia lena mea i Niu Sila nei, ma ua avea ai foi ma se faalavelave i nisi taimi i tagata femalagaai.
I nisi suiga la o le a faia i le tulafono o faiga faapisinisi (Commerce Act) o le a tele ai lava ni mea e faatalitalia le lipotia mai e malae vaalele. Aemaise lava le mea lenei, o le tausisi o le vaalele i lona taimi tonu na faamau i lalo o le pepa malaga a tagata o loo fuafua e faimalaga i lena vaalele.
Na fai sina tele o ni faaletonu na tulai mai faiga malaga a le kamupani vaalele fou lea faatoa 10 aso talu ona amata lana auaunaga i totonu o Niu Sila, le kamupani a le Jetstar, ona o le fesuisuiai soo o taimi faatulagaina o ana faiga malaga. Na iai nisi o vaega na tuuaia e le kamupani mo na suiga i ana taimi o faiga malaga, e pei o se faaletonu i le vaega o loo galulue i fafo o le malae vaalele, o faatulagaga i totonu a le malae vaalele, o nisi fou faatoa galulue ia latou vaalele, ma le tele lava o nisi alofaga sa taua.
I se faamaumauga o malaga a le Jetstar i le uluai ono aso talu ona amata lana tautua, e na o le 20 pasene o ana faiga malaga na mafai ona faia i totonu o le 15 minute o le taimi faatulagaina, peitai e oo mai le ogatotonu o le vaiaso na tea nei, ua tele se faaleleiga ua iai, ua tusa ma le 61.5 pasene ua faaleleia o na taimi o faiga malaga.
O le faiga lea o le a aofia uma ai lava ma isi kamupani vaalele, e pei o le Pacific Blue, Air New Zealand, o kamupani nei o loo felelei o latou vaalele i totonu o isi tamai malae vaalele o le atunuu. O se taumafaiga ina ia tele se faaleleia o lea itu o le auaunaga mo le mamalu o le atunuu.
O le itu sa faamamafa i lenei taumafaiga, ia malamalama lelei le auala e logoina ai pasese i ni suiga e toe faia i le taimi o vaalele, aua e le alofia lava le iai o ni suiga e tulai mai, aemaise i le faaletonu o le tau, poo nisi foi o pasese e tatau ona toe pue le isi vaalele e faaauau ai se faiga malaga, ae o loo tuai ona taunuu mai le isi vaa lea e sau ai. O nisi taimi e tulai mai se faaletonu tau le soifua maloloina i se tasi o le pasese i se taimi mulimuli lava o le a amata le faiga malaga, poo le toe alu foi o se isi taimi e toe lau ese ai ni uta a se pasese ua le oo ona alu, pe toe lau ese ni uta ua mamafa poo nisi lava faaletonu tau inisinia.
E iai le faamoemoe o lenei suiga o le a toe faaleleia atili ai auaunaga a kamupani vaalele, ma maua ai pea e tagata le lagona e mau faatuatuaina a latou kamupani vaalele o loo tautuaina i latou.
