Sa taualugaina galuega faaletausaga a le Asosi a tama ma teine tuai o le Kolisi a Avele poo le ACOPA i totonu o Aukilani nei i le po o le Aso Toonai na tea atu nei, aso 21 o Novema 2015.
Sa faatinoina lenei faamoemoe i le Hall a le Scout i Magele, ma sa auai le toatele o tama ma teine tuai faapea ai ma o latou taitoalua, aemaise susuga i Faafeagaiga ma o latou Faletua, o lupe faalele o Aiga ma Tama o Tama foi ma Aiga sa fofoa mai i totonu o le Kolisi a le Puataunofo.
O le susuga i le faafeagaiga ia Rev Maafala Koko o ia lea sa siitia le taulaga faafetai i le Atua ona o Lona alofa ma Lona agalelei ua mafai ai ona faaiuina ma le manuia fuafuaga uma sa faafeagai ai ma le Asosi i lenei tausaga.
Sa faapea ona galulue soosoo tau‘au ai ma le susuga i le faafeagaiga ia Charlie Reid i lea afiafi, ona sosoo ai lea ma le saunoaga a le afioga i le Peresetene, le susuga Vaniah Toloa. Na faafetaia e le afioga i le Peresetene ia tama ma teine tuai uma o le Asosi ona o galuega fita sa nafa ai ma le Asosi i lenei tausaga, amata mai lava i lona amtaga seia oo mai lava ina taualugaina i le vaiaso na tea atu nei.
Na ia faafetaia foi le alofa o le Atua e faaopoopo ai i le saunoaga a le susuga i le faafeagaiga, ona o le Atua lava sa tu mai i le taumua o le sa o le ACOPA lea lava ua iu ina tuta lana faigamalaga o le 2015 o loo faapea ona tautai pea o Ia i vaega uma.
O se avanoa faauro sa maua e toe fesootai ai sui uma o le Asosi ona o le faanaunauga lava ina ia saga faatumauina le maopoopoga ma ia mauaa ma mausali le tulaga lelei agai i luma o le Asosi.
Na lagona le leo o le fiafia i lea po ona sa maualuga lava le tulaga matagofie na oo i ai le faatasiga aemaise o le faaumaina o feau ma tiute na feagai ai ma le ACOPA i le 2015. Na totogi faapitoa lava i latou na nafa ma le faafiafiaina o lea po ae alo tama ma teine o le Asosi ia latou evaga faatamalii auā ua tuanai le atu ava ma le atuvasa, ae ua tuta i nuumanaia lo latou vaa ma ua mapu foi i fanua le vaa o le tautai sa folau i aau mamao.
E leai se isi na lei lagona le fiafia i lea afiafi ma o se afiafi foi na aoina ai se seleni faapitoa auā nisi o fuafuaga o loo alo atu i ai le Asosi mo le tausaga fou. O lea faamoemoe o le fia fausiaina lea o se falesamoa faautupoto i totonu o le Kolisi, e tua i ai le laumua i soo sona faamoemoe fai, aemaise foi pe a faatasi ma tauaofia le aoga i ana taligamalo.
O se tasi lea o vaega na faatāuaina i lea afiafi, e lē gata ina taualuga i ai galuega fai o le 2015, ae o se isi foi lea o amataga o se tasi o galuega ma faamoemoega fou pe a aulia i le alofa o le Atua ae taunuu atu i ai ma le manuia i lena tausaga. Na taumasuasua le tulaga tau i mea taumafa auā na oloa luuluu le afiafi. E leai se isi na faatamala i ana tapenaga auā le itu tau tausiga auā e masani le Avele i ona faiva alofilima i soo se tafa o le soifuaga. O gasesega, o taaloga, o taligamalo ma faafiafiaga. Na sili ona maualuga i lea afiafi le toe lagonaina o pesepesega faa-Avele, ina ua toe tuufaatasi leo o tama ma teine ae pepese i nisi o pese ua tele ina lauiloa ai le Kolisi o Avele i Samoa ma le Pasefika.
Ua iai le faamoemoe o le aso 30 o Ianuari 2015 o le a toe tauaofia ai le mafutaga, ona faia ai lea o le latou sauniga lotu e amata aloaia ai galuega o le 2016 pe a aulia atu i le alofa ma le agalelei o le Atua.
