O lea ua toe foi i tulaga masani galuega ma tiutefai i Samoa ina ua tuanai le faaiuga o le vaiaso ua mavae sa na o le faalologo i lapataiga o le afā malosi o Tuni sa agai sa‘o i le atunuu. O le Aso Faraile faasolo mai i le Aso Toonai na tea nei na vaaia ai timuga mamafa faalausosoo, ae o le oso malosi o matagi to faata‘uta‘u o vaaiga masani pe a oo ina latalata mai i Samoa ni afā malolosi.
O auga ma uiga nei o le tau na faaletonu ai feoaiga i nisi o vaega o le atunuu ina ua malosi tafega o alavai ma vaitafe ua poloka ai le alatele, aemaise o solo eleele sa lipotia mai i le agai i Fagaloa.
O Savaii foi sa pito molimauina e le atunuu o alala i nuu o Taga ma Salailua faapea nuu i lea vaega i Sisifo o Samoa le malosi tele o matagi a o lapataia le atunuu i taaviliga o matagi malolosi o le afā o Tuni.
O le vaitafe o le Maliolio na tatafe malosi, o nisi foi o nuu i Salafai na lipotia mai ai lologa ona o tafega aemaise lava o vaega maualalalo o loo atunuu. O le sami sa maualuluga galu ma auma malolosi ma sa lapataia ai alia ma vaa fagota.
O le maualuluga tele foi o galu o le sami na taofia ai malaga a vaa i le va o Mulifanua ma Salelologa. O le malaga mulimuli mai Savaii i le Aso Toonai na amata taofia ai malaga a vaa la‘upasese o le Malo.
E oo mai lava i le Aso Sa na tea nei o loo taofia lava malaga a vaa ma e toatele sa fia malaga mai i Upolu ae sa lē mafai ona o lea tulaga. E tuuina atu lenei tusitusiga mo le faasalalauina o loo tapunia pea malaga a vaa i le va o motu e lua.
Ua ese lenei tausaga ma isi tausaga ua tuanai atu sa pei o Tesema lava faasolo i le amataga o le tausaga fou e agai mai ai i Samoa uiga nei o le tau, peitai ua vave afea i le vaiaso mulimuli o Novema 2015, ma talosia ia faasolo atu i le masina faaiu o lenei tausaga e lē toe latalata mai ni afā malolosi i Samoa.
O le viiga ma le faafetai i le Atua ua na faasaoina si o tatou atunuu mai le ma‘ema‘eā o le afā o Tuni na semanu tatou te mafatia ai a o olioli atu e faamanatu le Kerisimasi o lenei tausaga. O motu tuaoi o Tutuila ma Manu‘a sa aafia foi i lologa ma tafega a vaitafe ona o timuga mamafa mai le afā o Tuni.
O nisi foi vaega o le motu i Sasae sa aafia i solo eleele. E tusia lenei lipoti o loo faamalosia pea lapataiga o matagi afā mai le afā o Tuni i luga o le atu Samoa, peitai o le aoauli o le Aso Sa na tea nei na manino mai ai le agai ese o taaviliga o matagi o lea afā ma le atu Samoa.
