E leai lava se atunuu e faatusa i ai Samoa i le loto tautua i le galuega a le Atua. O le upu moni e tusa lava pe mativa le faasoa a isi tagata Samoa, ae ta‘u loa se falesa e fia fausia, e matuā faapelepele le tupe auā se Tusigaigoa poo se Tausala mo le Mauga o le Atua.
O le afā o Eveni na afatia ai Samoa i le tausaga e 2011 lea na faaleagaina ai le malumalu tapuai o le EFKS i le afioaga o Vaiee, o le mamalu lava lea faasino i le afifio o Tama a le Fale, Te‘o ma Tu‘ia, faapea Usoalii ma Gataiala tainane le matua ia Maugata‘i, aemaise le alalatai o Safuiane, Faleata ma le fetalaiga ia Lutuimagamau.
O lea na mafua ai ona faatino le Tusigaigoa i le Aso Toonai na tea nei, aso 1 Novema 2014, auā se fesoasoani i Samoa mo le toe fausiaina o le malumalu. E lei alo tamala le mamalu o le Mafutaga a Vaiee i le tapenaga o le taulaga foai i matafale taitasi aemaise foi le mamalu o le auvalaaulia sa latou lagolagoina lenei faamoemoe. O le aofai o le tupe na maua mai tusi valaau, o siva a matafale, o alofaaga e tauala i sua ma siva a le auvalaaulia e $70,012.40. E na o le 8 itula na faatino ai le Tusigaigoa ae maua lenei seleni tele.
O le afioga i le Taitaifono ia Mase, sa saunoa e faafetaia le agalelei o Susuga i Faafeagaiga, faapea le mamalu i tupu ma tamaalii, o le loaloa o le auvalaaulia, o aiga, uo ma ē masani e tusa o le talia fiafia o le latou faatalauula atu e ala i se taulaga e ofoina i le latou Tusigaigoa mo le toe fausia o le Mauga o le Atua.
E lei faatamala foi le aao tusitusi o le mafutaga le Tofa ia Mata‘aga Falani Taiti na fai ma Fofoga o le Aso e faasolo le polokalame faapea ma le faasologa o faaaloaloga maualuga lea na maau i ai le Mafutaga a Vaiee i Ueligitone e tusa o tulaga masani o faamoemoega faapenei.
O le fetalaiga ia Taotua Sauvao na fai ma sui o le aufaigaluega paia a le Atua, le auvalaaulia ma le aofia e momoli le faafetai e tusa o faaaloaloga lea na tatala ai le Toga paia; i le Tao ma le Uatogi, o le Lautafifi ma le Lautamatama, aemaise le Tao fegauiai o Sa Tupuā, faapea foi Lau o le Fale o Mataafa, o toga a tupu e lē soona tatalaina, ae o lea ua faasau, ua faaeva foi ma ua foai atu, ma tofusia ai le mamalu o Samoa potopoto sa auai i lea faamoemoe.
O le susuga i le Faafeagaiga taulagi ia Perema Leasi o le ekalesia PIPC na taitai i le sauniga lotu i le amataga o le faamoemoe, ma o ia foi lea na toe saunia le tatalo faaiu ma faamanuia i le Mafutaga a Vaiee i matafale e 14 i le loto nuu, lototetele aemaise lava o le tautua lotu.
